GARA
IRUÑEA
KORONABIRUSAREN KRISIA

Kasuek apur bat behera egin dute, proba kopurua jaitsi ondoren

Aurreko egunean 929ra igo ostean, Hego Euskal Herrian 691ra egin zuten behera atzo koronabirus kasu berriek. Arrazoia bezperan baino ia bost mila proba gutxiago egin zirela izan daiteke. Nolanahi ere, Osakidetzan ospitaleratutakoen kopuruak beherakada itxaropentsua izan zuen, 59ra jaitsi baitzen, kopururik txikiena apirilaren 10etik.

gara-2021-05-02-Noticia

Hego Euskal Herrian erregistratutako kasu berriek beherakada handia izan zuten atzo; izan ere, ostiralean 929 antzeman ziren eta larunbatean, ordea, 691 , Lakuako eta Nafarroako gobernuek emandako datuen arabera. Hala, azken egunetan erregistratutakoetatik aldentzen diren parametroetan kokatzen da zifra.

Haatik, kopuru horiek erlatibizatu egin behar dira, kontuan hartuta ostiralean baino proba askoz ere gutxiago egin zirela larunbatean. Guztira 9.964 proba egin ziren, eta, ostiralean, aldiz, 14.337. Ildo horretan, positibotasun-tasa ostiraleko %6,5etik %6,93ra igo zen –Osasunaren Mundu Erakundeak pandemia kontrolpean edukitzeko jarritako %5eko langaren gainetik–.

EAEri dagokionez, 75 kasu erregistratu ziren Araban (78 bezperan), 298 Bizkaian (400 aurreko egunean) eta 208 Gipuzkoan (281 aurreko egunean) 8.120 proba-diagnostiko egin ondoren. Gainera, lau positibo gehitu ziren EAEko herrialdeekin loturarik ez duten pertsonen artean. Hala, positiboen tasa %7,2 iritsi zen, ostiralean baino lau puntu gehiago.

Nolanahi ere, Osakidetzan ospitaleratutakoen kopuruak beherakada itxaropentsua izan zuen, 59ra jaitsi baita (bezperan 95 izan ziren), kopururik txikiena apirilaren 10etik. Kontuan hartuta aurreko egunetan parametro hori ehun ingurukoa izan dela, baikortasun moderaturako elementua da atzo izandako jaitsiera.

Gainera, Hego Euskal Herriko ospitaleetako ZIUetan 226 pertsona daude, bezperan baino hiru gutxiago. Osakidetzan atzoko zifra mantendu zen eta covida duten 189 pertsona daude ZIUetan. Beraz, jaitsiera txiki hori Osasunbideko datuek azaltzen dute: 40 ospitaleratu izatetik 37 izatera igaro ziren Nafarroan.

Kasuak behera, tasa gora

Nafarroako ospitaleen okupazioaren ikuspegitik, Osasunbideak jakinarazi zuenez, 194 pertsona daude ospitaleratuta covid-19rekin (bezperan baino hiru gutxiago); aipatu bezala, horietatik 37 ZIUetan daude eta beste 19 etxeko ospitaleratzean. Gainerakoak, 138 paziente, plantan daude (aurreko eguneko kopuru bera). Gainera, 52 urteko gizonezko bat hil da, eta, beraz, Nafarroan 1.166 dira jada covid-19ak eragindako heriotzak pandemia hasi zenetik.

Nafarroako kasuei dagokienez, ostiralean 145etik 160ra igo ostean, Nafarroako Gobernuak jakitera eman zuen larunbatean 106 kasu antzeman zirela. Edonola ere, koronabirus kasu berrien beherakada, berriro ere, egindako proba kopuru txikiagoagatik azal daiteke, larunbatean 1.844 proba (1.452 PCR proba eta 392 antigeno-test) egin baitziren, ostiralean 2.898 izan zirenean. Hala, nahiz eta kasuetan behera egin, positiboen tasa %5,5etik % 5,7ra igo zen.

Birusak eragindako infekzioen intzidentzia metatua, eguneroko datuen arabera, 59.810 kasuetara iritsi da Nafarroan.

Kutsatze berriei dagokienez, eskualdeka, Iruñean eta Iruñerrian detektatu ziren positiboen %50, Tuterako osasun eremuan %10 eta Lizarrakoan %6. Gainerako positiboak (%34) Nafarroako beste eremu batzuen artean banatzen dira. Barañain eta Lakuntza (perimetralki itxita dago), zazpi positiborekin, eta Iruñeko Arrotxapea auzoa, seirekin, daude zerrendaren buruan. Gainerakoak kasu baten eta bost kasuren artean daude. Positibo berrien batez besteko adina 31,7 urtekoa da.

Horrez gain, larunbatean koronabirusaren aurkako 4.758 txerto jarri ziren Iruñea, Tutera eta Lizarra artean, eta, orotara, 250.395 dosi jarri dituzte dagoeneko Nafarroan orain arte jasotako 277.945 dosietatik. Ildo horretan, orain arte 74.956 pertsonak osatu dute txertaketa, larunbatean bigarren dosia 1.695 lagunek jaso ostean.