Urteroko gazte independentisten topalekua da udaberriko ekimena. Eta aurten ere hala izatea espero dute Ernaiko kideek; bi urteko geldialdiaren ostean, Euskal Herriko gazte independentistek berriz topo egiteko unea izango baita. Baztanen jarri dute hitzordua.

Covid-19aren ondorioz bertan behera gelditu zen 2020ko BidEHbat gazte martxa eta 2021eko apirilean zehar «eredua birpentsatu» eta “EH! Ez gaude inoren zain” lelopean hainbat kontzertu antolatu zituen gazte antolakundeak Hego Euskal Herriko hainbat txokotan.

Atzo Elizondon egindako agerraldian azaldu zutenez, aurten ekimena ohiko moduan gauzatzea da gazte antolakundearen asmoa. Horretarako, gazte martxa eta musika jaialdia uztartuko dituen formatua dute esku artean. Baztanen lurreratuko da egitasmoa, “BostEHun eta zutik!” lelopean.

Amaiurko gazteluaren setioaren 500. urteurrenari keinu eginez, «zutik dagoen herria eta zutik dagoen gazteria» badela aldarrikatuko dute. Efemeridea aitzakia hartuta, aurrera begira jarri nahi du antolakundeak: «Euskal Errepublika sozialista, feminista eta euskalduna eraikitzeko gazteriaren grina eta bultzada irudikatu nahi dugu ekimenean».

«Bestelako Euskal Herria posible delako: feminista, justua, ekologista... Eta gazteok eguneroko lanean ari garelako bide hori eraikitzen; herriz herri, auzoz auzo, gazte asanbladetan, neska gazte taldeetan, ikasgeletan, bertso eskoletan, osasungintzaren aldeko plataformetan...», gaineratu zuten gazte antolakundeko kideek.

Egitarau politiko eta musikala

Apirilaren 14an Zugarramurditik abiatuko da gazte martxa eta Erratzun egingo dute geldialdia. Hurrengo egunean Erratzutik Elizondora iritsiko dira eta bertan ekingo diote egitarau politiko eta musikalari. Hitzaldiek, tailerrek eta aisialdi eskaintzak osatuko dute egitarau zabala. Apirilaren 17an, Aberri Egunean, amaituko da Ernairen egitasmoa.

Alta, ostiral eta larunbatean musika eskaintzak hartuko du erdigunea, musika jaialdi oparoa antolatzen ari baitira. Hainbat talderen izenak ezagutarazi zituzten: Xiberoots, Herdoil, Perlata, Iheskide eta Tribade taldeak izango dira Elizondon, beste askoren artean. Hemendik aste batzuetara iragarriko dute kartela osorik, sarrerak salgai jartzearekin batera.