Joan den uztailean eurogunean diruaren prezioa igotzen hasi zenetik, milaka hipotekadunek erabaki dute maileguak tasa aldakorretik finkora aldatzen saiatzea.

Ostegunean Europako Banku Zentralak interes-tasak berriro igotzea erabaki zuen. Oraingoan %0,75 igo ditu, eurogunearen historiako igoerarik handiena, eta, beraz, diruaren prezioa %1,25ean dago, inflazioa baretzeko helburuarekin. Horrek maileguen berrikuspen gehiago ekarriko ditu, zalantzarik gabe.

Aukera horrek ziurtasuna eta egonkortasuna ematen du, baina kasu askotan dirua kostatzen zaio mailegua duenari. Baldintza-aldaketa erakunde berarekin zein beste batekin (subrogazioa) egiten bada, bezeroak komisio bat ordaindu beharko du, banku bakoitzaren arabera aldatzen dena eta egungo hipoteka-legeak maileguaren zenbatekoaren % 0,15era mugatzen duena lehen hiru urteetan. 150.000 euroko hipoteka baten kasuan 225 euro izango lirateke gehienez.

Horren aurrean, adituek gomendatzen dute kontuz ibiltzea eta kontuan hartzea hipotekak oso epe luzerako maileguak direla, 30 urtera artekoak, eta aldi horretan tasak hainbat aldiz igo eta jaits daitezkeela, inflazioak eta une bakoitzeko ekonomiak ezartzen duten erritmoan.

Euriborrak -bankuek elkarri dirua mailegatzean darabilten interesak eta hipoteken azken prezioa finkatzen duen adierazle nagusiak- azken hilabeteotan izandako igoerek ere bultzatu dituzte hipotekadunak interes-tasa edo bankua aldatzea komeni zaien aztertzera.

Espainiar Estatistika Institutuaren azken datuek erakusten dutenez, ekainaren amaieran 14.412 hipoteka-maileguk aldatu zituzten beren baldintzak jabetza-erregistroetan, urtebete lehenago baino %48 gutxiagok baina aurreko hilean baino %5,4 gehiagok.

Aldaketa horietatik 3.253 interes-tasekin soilik lotuta zeuden, eta gehienak tasa aldakorretatik finkoetara pasatzeko izan ziren. Horren aurrean, OCU Espainiako Kontsumitzaileen Elkarteak ohartarazi du ia finantza-erakunde guztiak interes-tasa finkoak igotzen ari direla.