35 urte ditu Emakundek eta azken zazpi urteetan Gipuzkoako Foru Aldundian Berdintasunerako zuzendari izan den Miren Elgarresta Larrabide bertako bosgarren zuzendari izendatu berri dute. Izaskun Landaidaren lekukoa hartu du Zumarragakoak. «Intentsitate handikoa» izan da lurreratzea. «Plaza» handiago batera egin duela salto adierazi zion atzo NAIZ Irratiari, eta horrek bere karrera profesionalean hazteko aukera emango diola gehitu zuen. Badaki Foru Aldundian ikasitakoa oso baliagarri izango zaiola.

Gipuzkoari aitortza

Asko ezustean harrapatu zituen Miren Elgarrestaren izendapenak, entzun genuen esaten Beatriz Artolazabal sailburuak bestelako profil bat bilatzen zuela sailak zituen erronka berriei aurre egiteko. Elgarrestaren eta azken urteetan lantaldean izan dituen lagunen iritzia da Aldundiak berdintasun politiketan egin duen lanari aitortza egin diotela bera Emakundeko zuzendari izendatuta. Politikagintza beste modu batera egiteko eta herritarrengana gehiago gerturatzeko ausardia izan dutela nabarmendu zuen.

Emakunderen funtsa, emakumeen aurkako indarkeria matxistari eta emakume eta gizonen arteko ezberdintasunari aurre egitea dela uste du. Bide horretan, emakumeen ahalduntzea bultzatzen jarraitzeaz gain, une honetan ekonomiaren arloa eraldatzeko eta esparru diferenteetan emakumeek espazio publikoa betetzeko zeregin handia dagoela azaldu zuen Zumarragakoak.

Mugimendu feminista

Udan, jaien testuinguruan, hiriburu batzuetan instituzioen eta mugimendu feministaren arteko elkarlanarekin atera ziren aurrera protokoloak, baina beste batzuetan ez zen posible izan batera aritzea.

Erakunde publikoen eta mugimendu feministaren arteko elkarlanaz galdetuta, azken urteetan alde bakoitzak protokolo propioak osatu dituela oroitu zuen Emakundeko zuzendariak, erantzun publiko bat eman eta biktimei ahalik eta arreta onena eskaintzearren. Orain bi aldeek dauzkaten «puntu amankomunak» identifikatzea onuragarria izango dela defendatu zuen Elgarrestak, «protokoloak gehigarri izateko, eta ez bat bestearen oztopo».

Horretarako, protokoloak norberaren «begiradarekin» egindakoak izan daitezkeenez, «bestearen begirada aintzat hartzearen» alde agertu zen. «Komeni da lanketa sakon bat egin eta puntu amankomunak ondo identifikatzea, eraginkortasunean irabazteko», azaldu zuen.

Zero tolerantziara bidean

Eraso matxisten inguruko albisteak eguneroko ogi diren arren, ezin garela inondik inora horretara ohitu azpimarratu zuen Miren Elgarrestak. Emakumearen Euskal Erakundearen zuzendari berriak uste du indarkeriaren aurkako jarrera indartu egin dela azken urteetan gizartean.

«Zero tolerantziaren bidean gaude», baieztatu zuen, baina sentsibilizazio lana egiten eta berdintasun politikak garatzen jarraitu behar dela gaineratu zuen.

Erantzun publikorako protokoloak eta elkarretaratzeak funtsezkoak izango dira bide horretan, Elgarrestaren arabera. «Gizarteak errealitatea zein den jakin behar du, erantzun egokiagoak emateko eta honi aurre egiteko. Bide onean gaude eta jarraitu egin behar dugu onartezinak diren kasu hauei modu egokian aurre egiten».

«Gure gizartea sentsibleagoa da, bistan da, erantzun horietan ikusten da. Baina erresistentziak ere badira, gure joko zelaian tentsio hori ere badago, ezaguna da», erantsi zuen. Egoera horren aurrean ez du beste aukerarik ikusten Elgarrestak: «Berdintasun politikak garatzen segitu behar dugu».

Alardea, «okerrera ez»

Irun eta Hondarribiko alardeen inguruan, Gipuzkoako Foru Aldundiak azken zazpi urteetan egin duen lana txalotu zuen, gatazka bizikidetzaren ikuspuntutik landu duelako eta diskrezioz aritu delako. «Gatazka hori bizikidetzaren ikuspuntutik lantzeko apustua egin genuen eta nolabait espazio publikotik atera zen Aldundia, sukaldeko lanak egiteko. Oso garrantzitsua da diskrezioz lan egitea bi aldeak gerturatzeko». Adituekin harremanetan jarrita, momentu horretan bi aldeetako keinuak partekatzea izan zuten helburuetako bat eta lan horretan ibili dira azken urteetan.

Baikor mintzatu zen, egoera ez delako okertu: «Egoerak hobera egin du, oso nabarmen agian ez, baina okerrera ez du egin gutxienez», eta, harago, belaunaldi berrien artean keinu baikorrak nabari dituela erantsi zuen.

Kultur ekitaldietan, herri askotan parekidetasunaren aldeko pausoak eman direla ikusita, «baikorrak izan behar dugu», aldarrikatu zuen Emakundeko zuzendariak, «bai Hondarribian eta bai Irunen ahalik eta azkarren gatazka hori bideratzeko».