Garbiñe Aranburu LABeko koordinatzaile nagusia eta Imanol Karrera Nafarroako bozeramailea Maria Chiviterekin bildu ziren atzo, Nafarroako Jauregian. Sindikatuak ohar batean nabarmendu zuenez, «herritarren erdiek bizi duten egoera prekarioaren» berri eman zioten Nafarroako lehendakariari, eta aberastasuna «bidezko moduan banatzeko» aldaketa sakonak martxan jartzeko eskatu zioten.

LABen iritziz, sindikatuaren eta Nafarroako lehendakariaren arteko estreinako bilera publikoak «erakundeen arteko harremanen normalizazioa berresten du». Bilera, gainera, «adeitasunez» egin zela azpimarratu zuen LABek. Chivitek ez zuen adierazpenik egin.

Sindikatuak adierazi zuenez, atzoko bilera joan den urteko ekaineko X. Biltzarraren ondoren hasitako bilera sorta nazionalaren barnean kokatzen da, Euskal Herriko eragile eta erakunde sozial, sindikal, politiko, enpresarial eta instituzional gorenekin egiten ari dena.

Sindikatuak Chivite lehendakariarekin partekatu zuen 2022an Nafarroako langileen lan- eta bizi-baldintzen azterketari buruz egin duen txostena, ondorioztatzen duena herrialdeko langileen erdiak egoera prekarioan bizi direla.

Izan ere, orotara 178.175 nafar langabezian bizi dira, egoera ez-aktiboan edo 1.400 eurotik beherako diru-sarrerekin. Hau da, Nafarroako 25 eta 64 urte bitarteko bi langiletik bat «prekaritate-egoeran bizi da, lan duinik gabe eta diru-sarrera eskasekin», eta jarduerarik gabe dauden 57.400 pertsonen artean 47.000 dira etxeko lanetan aritzen direnak, gehienak emakumeak, inolako errekonozimendu sozial edo ekonomikorik gabe. Horrenbestez, LAB sindikatuak lehendakariari eskatu zion «indarra egin dezala lurraldeko gehiengo sozialaren baldintzak hobetzeko lanetan».

Ildo horretan, LABek Chiviteri galdegin zion «enpresaburuek eta eskuindarrek erreforma fiskalari jarritako betoa gaindi dezala», aberastasuna modu justuan banatu eta lan- eta bizi-baldintzak hobetzea ahalbidetzeko.

Osasunbidea

Bestalde, sindikatuak nabarmendu zuenez, «Elkarrizketa Soziala deitzen duten horretako sindikatuekin eta CEN Nafarroako Enpresaburuen Elkargoarekin izandako bilerek eta gaur lehendakariarekin egin den topaketa publikoak berretsi egiten dute LABek Nafarroako eragile sozial, ekonomiko eta instituzional nagusiekin dituen harremanen normalizazioa».

Gainera, LABek aurreko astean azaldu zuenez, neurri horrek «50 profesional ingururi eragingo lieke une honetan», baina salatu zuen «sektore eta kolektibo batzuek interesa dutela, eta aldarrikapen hori gainerako langile fakultatiboen lan- eta antolamendu-hobekuntzen gainetik jartzen ari direla».

«Solaskide arrunta» izateko gaitasun horri garrantzi handia ematen dio LAB sindikatuak. Izan ere, adierazi zuenez, LAB da «izaera hegemonikoa» duen lehen indar sindikala Nafarroako Foru Administrazioan, Maria Chivitek zuzentzen duena, bai eta Nafarroako Gobernuaren menpeko den Esku-hartze Sozialeko sektorean ere.

Hala ere, LABen iritziz, «elkarrizketaren normalizazioak nahitaez ekarri behar luke parte-hartze sindikala baldintza berdinetan». Hori dela eta, beste neurri batzuen artean, sindikatuak Chiviteri eskatu zion «buka dezala LAB Nafarroako Lan Epaitegitik at uzteko ohitura, herrialdeko Gobernuak ordaintzen baititu epaitegi horren gastuak».

Bestalde, Osasunbidean lehen sindikatua den aldetik, LABek Chiviteri esan zion medikuen jardunean esklusibotasuna kentzea dirua baino zerbait gehiago dela: «Zerbitzu publikoak pribatizatzeko ate onartezina irekitzen duen profesional kopuru txikiari mesede egiteko neurria da».

LABek adierazi zuenez, «zerbitzu publikoak hobetzea eta indartzea gure bizitzak erdigunean jartzea da. Guztion osasuna zainduko duen osasun publiko eraginkorra bermatzeko, langile guztien lan eta ordainketa baldintzak hobetu behar dira».

Gainera, bozeramaileek lehendakariari gogorarazi zioten «40 urte hauetan zehar agerian jarri dela Foru Hobekuntzak Espainiarekiko duen mendekotasunak» eta lan-harremanen estatalizazioak jende anitzi «egoera larrian bizitzea» dakarkiela. «Balantzea defizitarioa baino ez da. Foru Hobekuntza agorturik dago, Nafarroak etorkizunari begiratu behar dio, bere subiranotasuna berreskuratu behar du», nabarmendu zuen LAB sindikatuak.