ELA, CCOO, Pixkanaka, ALE, LAB eta Asprobank Kutxabankeko sindikatuek atzoko prentsaurrekoan salatu zutenez, gero eta langile gutxiago daude, «presio komertziala nabarmen handitu da eta talentu handiko langile askok alde egiten dute baldintza ekonomikoak okertu direlako».

Langileen «muturreko egoera» horren haurrean grebara deitu zuten ostiral honetarako. Zehazki, sindikatuek salatu zuten Kutxabankeko langileek «presio komertzial handia» pairatzen dutela, «bulegoak itxi dituztelako eta plantillari gero eta helburu komertzial potoloagoak inposatzen dizkietelako».

Sindikatuek emandako datuen arabera, 2014 eta 2022 artean 293 bulego itxi dira eta 1.448 pertsona gutxiago daude lanean. «Langileak itota daude kontrataziorako presioa handitu delako eta, urtez urte, helburu komertzialak esponentzialki handitu direlako. Ondorioz, asko dira antsietateak jota daudenak, arazo fisiko eta mentalak medio».

Halaber, sindikatuak kexu dira Kutxabank talentu handiko langileak galtzen ari delako. «Lan baldintzak gero eta kaskarragoak direnez, gazteek Kutxabanketik alde egiten dute. Horri beste batzuen talentua erakartzeko arazoa gehitu behar zaio. Baldintza ekonomikoak okertu direnez eta sustapen profesionalerako zailtasunak daudenez, gero eta jende gutxiagok lan egin nahi du Kutxabanken», azaldu zuten.

Gainera, bulego askotan «segurtasun arazoak» dituztela salatu zuten.