Gipuzkoako SOS Arrazakeriak eta Zehar Errefuxiatuekin elkarteak “Izan Harrera” kanpainaren 4. edizioa aurkeztu zuten atzo. Mentoretza soziala sustatzea da proiektu honen helburua, errefuxiatuekin eta, aurten lehen aldiz, migratzaileekin, haien administrazio egoera edo nazioarteko babesa edozein dela ere.

Donostiako Koldo Mitxelena Kulturunean egindako aurkezpenean, elkarteko ordezkariek azaldu zuten “Izan Harrera” proiektuaren 4. edizioa nola egingo den. Silvana Luciani SOS Arrazakeriako kideak, Libe Madinabeitia Zehar Errefuxiatuekin-eko ordezkariak, Alberto Ariño egungo mentoreak, Iñaki Olaetxea aurreneko edizioan mentore izandakoak eta Laszlo ekoiztetxeko zuzendari Xabier Vicentek hartu zuten parte.

Boluntarioekin batera eratutako bikoteetatik abiatuta, laguntza, gida eta akonpainamendu prozesu bat ezartzen da, denbora jakin bateko harreman batetik abiatuta, aholkulariak gizartean egokitzapena erraztu dezan, pertsona horren garapen pertsonala eta soziala errazagoa izan dadin. Aurten, “Uste baino gauza komun gehiago ditugu” lelopean, herritarrak gonbidatu dituzte pausoa eman eta boluntariotza egitera, harrera errazteko. Proiektu honen helburua errefuxiatuak, asilo-eskatzaileak eta migratzaileak gizarteratzeko aukerak hobetzea da, haiei lagun eginez. Zerbitzuak, praktikoki eta borondatez, mentoreen parte-hartze jarraitua eskatzen du.

KANPAINA GRAFIKOA

Joan den martxoaren 20an, Laszlo Hace ekoiztetxeak Izan Harrera-ren 4. ediziorako aurkezpen bideoa filmatu zuen Tabakaleraren eraikinean. Filmaketak hamabi protagonista izan zituen, mentoreen eta mentoretza soziala jaso zuten lagunen ordezkari gisa. Atzo abiatu zen Laszlok diseinatutako kanpaina, zazpi bideo eta formatu desberdinetako material grafikoa biltzen dituena.