Gipuzkoako ikastetxeetako gazteek ikasturtean zehar egindako proiektuak erakutsi zituzten atzo, Tolosan, lehen aldiz ospatutako Elhuyar Zientzia Azokan. Guztira 23 proiektu ikusi ahal izan ziren, 12 eta 18 urte bitarteko 100 ikaslek sortuak. Gipuzkoako hamar ikastetxek hartu zuten parte azokan, eta horiekin batera Asteasuko Algaloop enpresaren ikerketa eta berrikuntzaren adierazgarriak egon ziren ikusgai. Azokaren helburu nagusia zientzia, teknologia, ingeniaritza, arteak eta matematika (STEAM, ingelesez) herritarrei gerturatzea eta gazteen artean arlo horien konpetentziak garatzea da, bizipen zientifikoak eskainiz.