GARA
BAIONA

Ekainean argituko da Hazparneko gaztetxeari buruzko auzia

Ttattola itxi eta urte eta erdi batera, Hazparnek gaztetxe bat behar zuela aldarrikatzeko, aspalditik hutsik zen Davidenia etxea okupatu zuen gazte talde batek. Ekintza hori defendatu zuten atzo arratsaldean, gazte bati egin zioten auziaren harira Baionako epaitegiaren aitzinean.

Ehun bat lagun bildu ziren auzia salatzeko eta heldu den ekainaren 22an epaileak hartuko duen erabakiaren berri izanen duen gazteari elkartasuna adierazteko.

Kazeta.eus atariak emandako informazioaren arabera, gaztearen defentsak hura errugabetzea galdetu zuen auzian. Prokuradoreak, berriz, 600 euroko isuna eskatu zuen, diru horren erdia ordaintzeko beharrik gabe.

Finean, etxe jabearen abokatuak sarrailaren hausteagatik eta prozedura gastuengatik kalte ordainak eskatu zituen.

2021eko agorrilean hiru astez luzatu zen Davideniaren okupazio sinbolikoaren ostean, Herriko Etxeak irtenbidea eskaini zien aurten gaztetxe berria estreinatu behar luketen gazteei.