Lakuako Kultura eta Hizkuntza Politika Sailak laugarren urtez segidan martxan jarri du “Eskatu Eskaini Euskaraz” kanpaina. Merkataritzan eta ostalaritzan euskararen erabilera sustatzeko eta erabiltzaileak sentsibilizatzeko asmoz, Arabako, Bizkaiko eta Gipuzkoako 131 udalerritan egingo da.

Atzo Gasteizen egin zen aurkezpenean aditzera eman zutenez, kanpainak helburu bikoitza du: herritarrak eta kontsumitzaileak aktibatzea eroste eta kontsumitzeko unean euskara erabiltzera, eta jarduera ekonomikoa herrian duten merkatariak eta ostalariak gonbidatzea euskaraz gerturatzen zaion herritarrari euskaraz keinu egitera. Horrela, herritarren, merkatarien eta ostalarien arteko harremanak euskaraz sustatzea du erronka nagusia kanpainak.

BI KANPAINA, NORANTZA BEREAN

Aurkezpenean azaldu zuten aurtengo kanpainak bete-betean bat egiten duela Lakuak, Nafarroako Gobernuak eta Euskararen Erakunde Publikoak lankidetzan ekainean abiatu zuen “Euskaraz Barra-Barra” marka berriarekin. Uda hasieran sortutako ikur berriak euskaraz hitz egiteko guneak identifikatzea du helburu, herritarrak toki horietan «estres linguistikorik gabe» aritzeko.

Erakundeen eta merkataritza elkarteen arteko lankidetzak emandako fruituez aritu zen Maria Nanclares Gasteizko zinegotzia. Haren ustez, «hemen gauden erakunde eta elkarte guztiok norabide berean arraun egiten dugu, helburu berarekin: bezeroak eta merkatariak konektatzea, harremanak euskaraz izan ditzaten. Hasieratik euskaraz hitz egiteko beldurra galtzeko».