Amestutako urtea bizi izan du Irene Paredes atzelari gipuzkoarrak eta 2023a buruan gordeta edukiko du betiko. Urte amaiera arte sariak eta omenaldiak jasotzen aritu da. Ziur aski bereziena jaso zuen atzo. Txapela jantzi ondoren, bere izena daraman futbol zelaian, eskaintza dotorea egin zioten herrikideek. Eta ez da gutxiagorako! Euskal jokalari batek lortu duen inoizko palmaresik handiena du Irene Paredesek: 2023an Bartzelonarekin Liga, Superkopa eta Txapeldunen Liga irabazi ditu, eta Espainiako selekzioarekin munduko txapeldun suertatu da. Zorionak!