Duela bi urte bezala, Ugaitz Mugertzak irabazi zuen III. Euskal Duatloiko txapela atzo, Azpeitiko zezen plazan nagusi izanik. Mutrikuarrak lehen lanetik, etzanda ebaki beharreko lau enborretatik, probako agintea hartu zuen. Korrika alde hori handitu ere egin zuen, eta marka hobetzeko moduan heldu zen azken lanera, zutik ebaki beharreko lau enborretara. Enbor gogorrekin topo egin zuen, ordea, batez ere hirugarrena, eta bertan behera geratu zitzaizkion marka gogoak (31:56). Kañamares IV.a izan zen bigarrena, lan erregularra eginda, atzetik aurrera etorri zen Jauregirekin lehia bizian.