Gipuzkoako aterpetxeetako garbiketa eta jantokietako langileen egonkortze prozesuan eta Galdakaoko Udaleko teknikari postuaren kasuan euskara eskakizunen aurka epaitegietan izan diren «oldarraldien» aurkako elkarretaratze bana egin zuten atzo LABek eta Galdakaoko udal langileek.

Gipuzkoako kasuan, hainbat partikularrek auzitara jo zuten, CCOOk babestuta, langileak «baztertzeagatik», eta atzo hasi zen epaiketa. Horren aurrean, LABek kritikatu zuen «euskaraz bizi nahi duten» pertsonak «bigarren mailan» kokatzen dituztela auzi hauek.

Galdakaon, bestalde, udal langileek protesta egin zuten, epaitegi batek Udaleko teknikari lanpostu bat egonkortzeko 2022an egindako deialdian ezarritako euskara eskakizuna baliogabetu duelako.