Bilbobuseko langileek apirilaren bederatzian hasitako greba mugabea amaitu da, langileen gehiengoak enpresarekin adostutako aurreakordioa atzo onartu zuelako. Plantilla osatzen duten 650 langileetatik 527k eman zuten iritzia; hitzarmenaren aldeko 332 boz jaso dira, 186 langilek ezezkoa bozkatu dute, hiru boto zuri izan dira, eta sei baliogabeak. UGTk, CCOOk eta USOk sinatu zuten aurreakordioa pasa den asteartean; ELA, LAB eta ESK, aldiz, akordioaren aurka agertu ziren.

DESADOSTASUNAK

ELA, LAB eta ESK sindikatuek aurreakordioaren edukia errefusatu zuten, langileen erosteko ahalmena ez dela bermatzen argudiatuta.

Erabakitakoaren arabera, soldata-igoera funtzio publikoan aplikatzen den igoerari dagokio. 2022rako eta 2023rako, funtzio publikoaren soldata-igoeraren baliokidea gehi %4 hitzartu zuten.

Beste neurri batzuen artean, gehiengo sindikalak eta enpresak jakinarazi zuten «hobekuntzak adostu» dituztela, «egoera prekarioei aurre egiteko». %62ko lanaldi partzialeko langileak lanaldi osora igaroko dira, eta behin-behineko langileen zati bat «%62ko hutsunea» betetzera pasako da, adierazi zutenez.