Espetxe Zaintzako epailearen ebazpenen bitartez, baldintzapean aske geratu dira bi preso: Burlatako Maria Lizarraga (espetxean ia 16 urte preso igaro ondoren) eta Zaldibiako Oskarbi Jauregi (kartzelan 23 urte pasatu eta gero), Etxeratek aditzera eman zuenez.

Maria Lizarraga Merino 2008ko irailean atxilotu zuten. 2022ko ekainean hirugarren gradura pasatu zutenetik baliabide telematikoen bidez bete du zigorra, Etxeratek zehaztu zuenez.

Kartzelan eman zuen azken etapa Iñigo Gutierrez algortarrarekin espetxean izan zuen Izadi alabarengandik banandu ez zezaten egindako borrokak markatu zuen.

Biak Madrilgo Aranjuez espetxeko familia moduluan egon ziren, 2022ko urtarrilean Zaballako kartzelara eraman zituzten arte. Espetxeen arteko mugimendu hori Izadi txikiak hiru urte bete eta gutxira gertatu zen.

Lekualdaketa hori iragarri zen egun berean, 2021eko abenduaren 30ean, ezagutzera eman zen Gutierrezi aho batez eman ziotela hirugarren gradua, eta horrek bermatuko luke alaba aitarekin egon zitekeela gutxienez, kartzelatik atera eta amarengandik urruntzera behartzen zutenean.

Hala ere, kasuaren krudeltasuna agerian geratu zen berriz, aste gutxi batzuen buruan, otsailaren erdialdean espetxera itzultzera behartu baitzuten Gutierrez, Auzitegi Nazional espainolak hirugarren gradu hori ezeztatuta, presoak «barkamena» eskatu ez zuela argudiaturik.

Hilabete gutxi batzuk baino ez zitzaizkion falta orduan, uztailean zigorra guztiz bete bitarte. Egoera honek elkartasun uholde handia sortu zuen Euskal Herrian.

“Izadi. Espetxean jaiotako atzera kontaketa” dokumentalak jasotzen ditu bi presoek eta alabak auzi honetan bizi izan zituzten gorabeherak. NAIZen ikusgai dago.

OSKARBI JAUREGI, 23 URTE PRESO

Oskarbi Jauregi Amundarain Zaldibiako preso politikoa ere baldintzapean aske geratu zen atzo, Espetxe Zaintzako Epaitegi Zentralaren ebazpenaren bidez. 23 urte zeramatzan preso, Etxeratek atzo zabaldu zuenaren arabera.

2023ko abenduan hirugarren graduan ezarri zuten (aurretik neurri hori ukatu zioten), eta 2024ko martxotik baliabide telematikoen bidez bete du bere zigorra.