Ironman probako gizonezkoen Munduko Txapelketa jokatu da asteburuan Hawaiin, lasterkarien ahaleginak muturrera eramaten dituen karrera: 3,86 kilometro igeri ur zabalean, 180 kilometro bizikletan eta maratoi bat korrika (42,2 kilometro). Irabaztea sarritan gutxienekoa izaten da, askoren helburua proba bera bukatzea izaten baita (alboko irudian ikusten den legez). Poza demokratizatu egiten da, milaka lasterkari garaile sentitzen baitira. Txapeldunari meritua aitortzeko, Patrick Lange alemaniarra gailendu zen, 7 ordu, 37 minutu eta 53 segundoko denbora eginda.