Ibilgailu militarrak zeramatzaten kamioiek Euskal Herria zeharkatu dute azken egun hauetan. Helikopteroak ere ikusi izan dituzte errepideen gainean hegan. Militarrentzat ez dago Irun eta Hendaia arteko mugarik, migratzaileentzat oso erreala izaten jarraitzen duena. Maniobra edo ekipo horien jomugari buruzko ohartarazpen ofizialik ez da izan, eta, beraz, inork ez daki ezer haien xedeaz edo helmugaz. Informazioa ezkutatzea eta gizartea militarizatzea beti batera etortzen dira.