Astelehenean Bilbon inauguratutako “Atalase” izeneko memorialaren harira polemika izan da egunotan. Instalatutako plakan, Iñigo Cabacas “Behar beste argitu ez diren kasuak” atalean dago, 2021eko urtarrilean Estatu espainoleko Auzitegi Gorenak epaiketaren ebazpenean onartu arren Ertzaintzaren karga batean pilotakada batek hil zuela. Egiari Zor elkarteak sare sozialen bidez salatu zuen, baita Mikel Martinez de Murgia Mendizabalen izena falta dela ere, Lakuak aitortu duenean Guardia Zibilak estrajudizialki exekutatu zuela. Iñigo Cabacas Herri Harmailak atzo zabaldutako bideo batean ikus zitekeenez, norbaitek plakan “Ertzaintzak eraila” zioen pegatina jarri zuen. Akatsak zuzentzea premiazkoa da, memorial serio bat izan dadin.