Arrigorriagako Udalak deituta, 200 bizilagun inguruk elkarretaratzea egin zuten atzo eguerdian Udaletxeko plazan, txinatar jatorriko merkatari batek ostiralean jasandako talde-erasoa gaitzesteko. Maite Ibarra alkateak ohar bat irakurri zuen, udalbatzaren «erabateko gaitzespena» adieraziz.

Gertaera joan den ostiralean gaueko bederatziak aldera izan zen, zortzi bat gaztek osatutako talde bat Arrigorriagako Severo Otxoa kaleko janari denda batera hurbildu zenean. Hiru gazte dendara sartu ziren eta produktuak lekuz mugitzen hasi ziren. Dendariak beren jarrera aurpegiratu zien eta, kalean, gazteetako batek kolpe bat eman zion, lurrera erori zen eta beste bi gazte ostikoak ematen hasi zitzaizkion. Ondoren, korrika alde egin zuten.

Biktimak senide bati deitu zion. Honek lurrean etzanda aurkitu zuen, eta osasun-zerbitzuetara deitu zuen, arreta eskaini ziezaioten. Ospitalean artatu ondoren, erasotuari alta eman diote eta etxean dago. Beso bat eta hanka igeltsatuta ditu, eta aurpegian hematoma handia du. Haren bilakaeraren zain daude ebakuntza egiteko.

Merkatariaren alabetako batek azaldu duenez, aitak aurretik ere jasan izan ditu jazarpen-egoerak.

«HORRELAKO JARREREK EZ DUTE LEKURIK»

«Horrelako jarrerak guztiz onartezinak dira, eta ez dute lekurik ez Arrigorriagan ez inon. Udalak elkarrizketarako, besteekiko errespeturako eta bizikidetzarako konpromisoa berresten du, eta elkartasuna, gertutasuna eta babesa adierazi die erasoa jasan duen pertsonari eta haren familiari», esan zuen alkateak, elkarretaratzean bost minutuko isilunea egin aurretik.

Poliziak, lortutako informazioarekin, ikerketa-lanei ekin zien, eta, horren ondorioz, erasoaren egile nagusia, 20 urteko gizon bat, udaltzainaren egoitzara joan zen azkenean. Atxilotu egin zuten, lesio-delitu bat egotzita.

Atxilotua Ibaizabaleko Ertzain-etxera eraman zuten. Bertan ordu batzuk pasatu ondoren, epailearen esku utzi zuten. Ertzaintzak ikerketa zabalik du gorroto-delituagatik, eta atzo arratsaldean gainerako erasotzaileak identifikatu nahian jarraitzen zuen.