‘‘Iruña-Veleia argitu, ez suntsitu’’ lemapean eta izen bereko plataformak deituta, Gasteizko kaleak zeharkatu zituzten atzo aztarnategian egiten ari diren «sarraskia» salatzeko eta auzia «behin betiko argitzeko» eskatzeko. Batez ere, hondeamakinak «hainbat aldiz» sartu izana gaitzetsi zuten, aztarnategiaren «hondoko harria jo arte», eta beste behin Iruña-Veleiako grafitoak benetakoak diren ala ez argitzeko proba gehiago egin daitezela eskatu zuten. «Aski litzateke laborategi espezializatuetara piezen lagin bat bidaltzea. Arabako Foru Aldundiak behin eta berriz uko egin dio Lurmenek eta argitzearen aldeko taldeek egindako eskariari. Zerbaitegatik izango da», adierazi zuten.