Guissenyko hondartzan (Bretainia) kamioiak joan-etorrian ibili dira azken egunotan: guztira, 40.000 metro kubiko harea eramango dute hara -momentuz erdia iritsi da; datorren urterako utzi dute gainerakoa-, hango dunan higadurak izan duen eraginari aurre egitearren. «Epe motzera, ezinbesteko operazioa da», azaldu du Udalak. Zehazki, bere esanetan, azken 20 urteetan beste horrenbeste metro egin du atzera dunak; urteko, metroa. «Itsasoaren igoera geldiezina ez da errudun bakarra; gizakiaren jardunarengatik ere gertatu da hau», ohartarazi du.