«Pentsiodun prekarioen bizitza hobetzea helburu duen» herri ekimen legegileak (HEL), Euskal Herriko Pentsiodunen Mugimenduak bultzatutakoak, 145.142 sinadura jaso ditu, pentsioak lanbide arteko gutxieneko soldatarekin pareka ditzaten. Horiek aurkeztu eta egun batzuetara, atzo, bilera bat eskatu zuten Imanol Pradalesekin. Izan ere, ekimenak gizartean duen garrantzia eta irismena zuzenean azaldu nahi diote lehendakariari.

Atzo eguerdian Lehendakaritzan bilera eskaera aurkeztu ondoren eginiko agerraldian, ekimenaren batzorde sustatzaileko bozeramaile Arturo Val del Olmok eta Jesus Mari Soubiesek hala azaldu zuten. Esan zutenez, HELak «nahikoa babes du lehendakariak gurekin elkarrizketa bat izan dezan». Mikel Torres lehendakariordearekin beste bilera bat eskatu dute, telematikoki.

Maiatzaren 15ean aurkeztu zituzten sinadurez gain, EAEko sindikatu guztiek, «salbuespenik gabe», ehunka eragile sozial eta feministek eta kulturako, kiroleko eta beste eremu batzuetako 289 pertsonak babesten dutela nabarmendu zuten Lehendakaritzaren atarian.

Beraz, Pradalesi hau helarazi zioten: «Aringarririk gabeko iruzurtzat joko genuke tramite luze eta konplexua, azpiegitura bat, gastu asko dakartzaten baliabideak abian jartzea eta gizartea tentsioan jartzea eskatzen duen ekimen bat kontuan ez hartzea».

100.000 pentsioduni, tartean 65.000 emakumeri, eragingo liokeen ekimen hau Gasteizko Parlamentuko hiru taldek babestu dutela gogorarazi zuten; alegia, EH Bilduk, Sumarrek eta PPk ekimena aintzat hartzearen alde bozkatuko dutela. «Gobernua osatzen duten bi taldeak falta dira; EAJ eta PSE», deitoratu zuten bozeramaileek.

Berretsi zuten, halaber, emakumeak izan direla, historikoki, «baliabide publikorik ez egoteagatik, adingabeak eta mendekotasuna duten pertsonak zaintzen lan egin dutenak». Hori dela eta, esan zutenez, pentsioa lanbide arteko gutxieneko soldatarekin berdintzeak batik bat horiei mesede egingo lieke.

Azaldu zutenez, ekimen legegile hau Konstituzio espainolak eta EAEko Autonomia Estatutuak babesten duten herritarren parte-hartzea da. «Gure ustez, maiatzaren 15ean aurkeztutako sinadurak balioztatzen direnean, Legebiltzarreko mahaiak 15 egun emango dizkio Eusko Jaurlaritzari, nahi dutena edo ezer ez alega dezaten», gaineratu zuten bozeramaileek.