Hemen da, azkenik, irundarrek aspaldidanik itxaroten zuten hilabetea. Ekaina oso garrantzitsua izaten da bertako herritarrentzat. Irungo festei, ekainaren 30ean Alarde Egun handiaz biribilduta, beste ekitaldi ikusgarri bat gehituko zaie asteburu honetan: eskubaloi Kopako azken fasea. Bertan hiriko taldea ere egongo da: Bidasoa-Irun. Eta, Kopaz gain, beste sari bat ere badago jokoan: Europarako txartela.

Gipuzkoarrek ahalik eta hobekien amaitu nahi dute denboraldi gogor eta luze hau. Liga, Espainiako Kopa eta Europa izan dute jokoan, eta orain Kopari ekingo diote. Asobalen ez dute Europan lehiatzeko sailkapen zuzena lortu eta, horretarako, ‘etxeko’ Kopa irabazi beharko lukete; edo, beste aukeren artean, txapeldunorde amaitu. Beste hirugarren aukera bat ere badago: Barçak irabaztea eta dagoeneko txartela duen Torrelavegak txapeldunorde amaitzea.

Inoiz baino orekatuagoa dator azken fase hau. Barça ahalguztidunak faborito gisa hasiko du txapelketa eta Bidasoak finalean bakarrik izango luke aurkari talde katalana. Horretarako, Jacobo Cuetara Bidasoako entrenatzaile ohiaren Torrelavegari irabazi behar dio lehenik final-laurdenetan, ondoren finalerdietan beste aukera bat izateko finalera iristeko. Bidasoa ez da momenturik onenean iristen, baina anfitrioia da, eta horrek beti ematen du indar gehigarri bat. Artalekuko sarrerak aspaldi agortu ziren eta, beraz, etxeko zale ugari izango dituzte ondoan.