Zinemaldiko kartelen aurkezpen ekitaldia egin zen atzo Tabakaleran. Jose Luis Rebordinos Zinemaldiko zuzendariak eta Ruth Perez de Anucita Komunikazio arduradunak primiziaz jakinarazi zuten Donostia Saria emango diotela Esther Garcia El Deseo-ko ekoizleari, ehun lan baino gehiago egindakoa, eta Marisa Paredes izango dela Zinemaldiaren irudi nagusia. Paredes bigarren aldiz izango da karteleko protagonista, Zinemaldiaren 54. edizioan agertu baitzen aurrenekoz.

Zinemaldiko zuzendariaren hitzetan, Esther Garciak «Espainiako eta Latinoamerikako zinemagintzaren nazioartekotzean funtsezko rola izan du», Pedro eta Agustin Almodovarrekin batera hainbat proiektu arrakastatsu gidatu baititu.

Pedro Almodovarrekin ‘‘Matador’’ (1986) filmean lehen aldiz jardun zenetik, funtsezko pieza izan da Manchako zuzendariaren ondorengo proiektu guztietan; adibidez, ekoiztetxeari izena eman zion ‘‘La ley del deseo’’ (1987) filma, ‘‘Mujeres al borde de un ataque de nervios’’ (1988) edo ‘‘Todo sobre mi madre’’ (1999). Haren ibilbidean, arriskuaren, independentziaren eta bikaintasunaren aldeko apustu etengabeaz gain, emakumezko ikus-entzunezkoen aldeko konpromisoa ere nabarmendu da.

Garciak, gainera, ospakizun betean jasoko du Donostia Saria, aurten El Deseo ekoiztetxeak 40. urteurrena bete du eta.

MARISA PAREDESEN OROIMENA PIZTUZ

Marisa Paredes, zinema eszenako izar handia, Donostiako Zinemaldiarekin estuki lotuta egon da azken mende erdian. Lehen aldiz 1977an jaialdira etorri zenetik, haren presentziak arrastoa utzi du, eta 2025eko edizioan bere irudia da kartel ofizialeko protagonista, omenaldi gisa, iaz zendu ondoren. Jose Luis Rebordinos zuzendariaren arabera, Paredes «jaialdiaren lagun handia» izan da, eta bigarrenez da haren irudia Zinemaldiaren kartel nagusian.

Donostiako Wallijai estudioak diseinatu du kartela, eta Manuel Outumurok 2000. urtean ateratako argazki batean du oinarria. Kartelaren diseinatzaileak, Jose Angel Peñak, azaldu zuen «zinemaren eta publikoaren arteko lotura zuzena» islatu nahi izan zuela, pertsona askotarikoen siluetak erabiliz eta haien barruan zinema genero desberdinak irudikatuta.

Zinemaldiak azken urteetan Euskal Herriko zein nazioarteko zinemagintzaren aldeko «apustu argia» egin duela ere esan zuten: kartel bakoitzean artista handi baten omenezko irudia, eta genero, adin, jatorri desberdinekiko ikuspegi irekia. Sektoreko dinamika berri horren isla ere bada kartel guztien izaeran argazkia eta ilustrazioa uztartzea, «denok daramatzagu hainbat film geure baitan» mezua nabarmentzen baita.

Antolakuntzaren ikuspegitik, Perez de Anucitak azaldu zuen urtero legez erronka nagusia «edizio ahalik onena eskaintzea» izango zela, «kontrolaezinak» diren faktoreekin bizi diren arren. Adierazi zuen euskal zinema zein Estatu espainolekoa une sortzaile gorenean daudela eta jaialdiko programazioa horren isla zuzena dela.

Zinemaldiaren artxibo historikoa osatuz, aurten 1959ko eta 1971ko Zinemaldiko kartelak ere berreskuratu eta zaharberritu dituztela ere iragarri zuten, jaialdiaren memoria kolektiboari balio erantsia ematearren.