Abuztuaren 4ra arte euskal flotak 7.100 tona hegaluze arrantzatu ditu eta euskal lonjetan lehenengo salmentako batez besteko prezioa kiloko 3,90 eurokoa izan da. Horretaz gain, antxoa arrantzatzeko lehen seihilekoko kuota agortu dute, baina berdelaren arrantzaldia ez da horren ona izan, euskal itsasontziek ez baitute kuota agortzea lortu.

Leandro Azkue Lakuako Gobernuaren Elikadura, Landa Garapen, Nekazaritza eta Arrantza Saileko Arrantza eta Akuikultura sailburuordeak plazaratu zituen datuak. Azaldu zuenez, 2025erako hegaluzearen arrantzarako Estatuko kuotaren barruan (26.000 tona), «abuztuaren 4ra arte 12.150 tona harrapatu dira, kuotaren %47». Jakitera eman zuenez, kopuru horretatik «euskal flotak 7.100 tona arrain harrapatu ditu, estatuko arrantza osoaren %60 inguru». Halaber, adierazi zuen euskal lonjetan lehenengo salmentako batez besteko prezioa kiloko 3,90 eurora iritsi dela.

LEHORRERATZEAK EUSKAL KOSTATIK KANPO

«Lehorreratzeei dagokienez -zehaztu zuen Azkuek- kontuan hartu behar da gure flotak beste erkidego batzuetako portuetan lehorreratzen dituela harrapaketetako batzuk, eta gure portuetan ere deskargatzen direla beste batzuk». Horrela, Bizkaiko eta Gipuzkoako portuetan 6.000 tona lehorreratu dira guztira, honela banatuta: Bermeon 550.000 kilo deskargatu dituzte eta 3,75 euroan saldu dute kiloa; Ondarroan tona bat eta 800.000 kilo lehorreratu dira eta kiloa 3,10 euroan saldu dute; Getariako portura bi tona heldu dira eta bertan saldu da garestien, kiloa 3,96 euroan; Pasaian 115.000 kilo deskargatu dituzte eta 3,40 euroan saldu; eta Hondarribian tona eta erdi lehorreratu dute eta kiloa 3,81 euroan saldu dute.

ANTXOA ETA BERDELA

Antxoaren arrantzaldiari begiratuta, espainiar Estatuak duen 28.600 tonako kuotatik Euskal Herriko flotari 8.000 tona esleitu zizkioten; 7.200 tona urteko lehen seihilekorako, eta 800, urtearen bigarren erdirako. Bada, Azkue sailburuordeak azaldu zuenez, ekainaren 10erako euskal flotak lehen seihilekoari zegokiona arrantzatua zuen eta ordutik aurrera euskal itsasontzi gehienak hegaluzea arrantzatzen ibili dira. Halaber, jakinarazi zuen bigarren seihilekoari dagokion kuota udan eta udazkenean zehar arrantzatzea espero dela.

Halaber, jakitera eman zuen euskal flotari zegozkion 7.500 tona berdeletik 5.800 tona harrapatu dituztela. Izan ere, sailburuordearen hitzetan, «nahiz eta arraste-ontziek eta inguraketa-ontziek kuota osoa kontsumitzea lortu zuten, ‘arrantza-aparailu txiki’ edo tretzaontzi eta sare txikiak deiturikoekin arrantzatzen duten tamaina txikiko ontziek % 35 baino ez zuten lortu». Hori dela eta, azaldu zuen laguntza batzuk jarri dituztela martxan, tripulatzaileko 800 eurokoa, arrantzaldi txarra konpentsatzeko xedez.

Bestalde, euskal flota «askotarikoa» dela txalotu zuen sailburuordeak.