Arabako, Bizkaiko eta Gipuzkoako barne produktu gordinak (BPG) %2,2ko hazkundea izan du 2025eko bigarren hiruhilekoan iazko aldi beraren aldean, eta %0,5ekoa urteko lehen hiruhilekoaren aldean. Era berean, 14.035 lanpostu garbi sortu dira eta, horrela, enpleguak %1,4ko hazkundea izan du urte artean eta %0,3koa hiruhileko artean, Eustaten datuen arabera.

EAEko BPGaren urte arteko %2,2ko hazkundea euroguneko ekonomiarako (%1,5) eta Europako Batasun osorako (%1,6) egindako azken zenbatespenaren gainetik dago.

Eskaintzaren ikuspegitik, balio erantsiaren bilakaera positiboa izan da EAEn, urte arteko datuei dagokienez sektore guztietan, lehen sektorean izan ezik. Hain zuzen ere, lehen sektoreak %0,4 jaitsi du balio erantsia termino errealetan, aurreko urteko hiruhileko beraren aldean, aurreko hiruhilekoaren aldean %0,2 igo den arren.

Eskariaren aldetik hazkunde orokorra izan da. Etxeetako azken kontsumoko gastuak eta etxeen zerbitzurako irabazi asmorik gabeko erakundeek (kontsumo pribatua) %2,9ko urte arteko hazkundea izan dute, aurreko hiruhilekoaren aldean %0,9 igo ondoren.

Enplegu mailei dagokienez, arduraldi osoko lanpostu baliokideetan neurtuta, %1,4 igo da 2024ko bigarren hiruhilekoarekin alderatuta, aurreko hiruhilekoarekiko %0,3 igo ondoren. Guztira, 14.035 lanpostu garbi sortu dira EAEn.

Lehen sektoreak %0,1eko jaitsiera izan du enpleguan 2024ko bigarren hiruhilekoarekin alderatuta, eta hiruhileko artean ere %0,1eko jaitsiera izan du. Industrian aurreko hiruhilekoan baino %0,2 enplegu gutxiago sortu da.

Eraikuntzan enpleguaren bilakaera positiboa izan da, bai urte artean (%1,9ko igoera), bai hiruhileko artean (%0,5eko igoera), eta zerbitzuen sektorean lanpostu kopurua %1,8 igo da urte artean; hiruhileko artean %0,4 igo da.