Europako Ikerketa Kontseiluko ERC Synergy Grant beka ospetsua jaso du Unai Pascual BC3 zentroko ikertzaileak. Beste hiru ikerlarirekin batera Afrika ekialdeko bederatzi inguru menditsutan gizartearen eta naturaren arteko interakzioak aztertuko ditu, etorkizun jasangarriagoetarako bideak aurkitzeko.

Hamar milioi euroko laguntza jasoko dute, Afri-CAB ekimenaren barruan. Helburua klima aldaketak Afrika ekialdeko ekosistemetan eta mendi komunitateetan duen eragina aztertzea da.

Europako Batzordeak hamar milioi euro finantzatu ditu, eta Ingalaterrako, Hegoafrikako, Alemaniako eta Euskal Herriko lau adituk jasoko dute laguntza, Kenyako, Tanzaniako eta Ugandako bazkideekin osatutako taldeetan ikertzeko. Unai Pascual ekonomialari ekologikoaz gain, Rob Marchantek, Yorkeko Unibertsitateko ekologia tropikaleko katedradunak; Laura Pereirak, Witwastersrandeko Unibertsitateko Aldaketa Globaleko Institutuko jasangarritasunaren eraldaketen eta etorkizunen katedradunak; eta Thomas Hicklerrek, Seckenberg Institutuko biogeografiako katedradunak jasoko dute beka.

Taldeak Afrikako ekialdeko bederatzi eskualdetan tokiko komunitateek naturarekin dituzten interakzioak, ekosistemen bilakaerak eta, aldaketa globalak bizkortzen ari diren testuinguru baten aurrean, mendi erresiliente eta jasangarriak lortzeko egon daitezkeen bideak aztertuko ditu.