Bidasoa Kirol Elkarteak “Lurraldea gara” aurkeztu zuen atzo, «klubaren konpromisoa Euskal Herriko lurraldearekin sendotzea eta eskubaloia belaunaldi berrietara hurbiltzea helburu duen ekimena». Proiektuaren erdigunean teknifikazio-programa sendo eta zabala dago, Euskal Federazioak 16 urtetik beherakoekin egiten duen lana osatzeko; Bizkaian, Araban, Gipuzkoan, Nafarroako iparraldean eta Akitania Berriko hegoaldean garatuko da, oinarrizko eskubaloia bultzatzen eta klubaren balioak transmititzen jarraitzeko.

Lehen teknifikazio saioa Bilbon egingo da, hilaren 26an. Saio hauek jokalari gazteentzat izango dira; esperientziak partekatu, ikasi eta klubeko teknikarien eskutik hazteko aukera izango dute. Testuinguru horretan, Gurutz Aginagaldek, klubeko presidenteak, azpimarratu zuen “Lurraldea gara” duela urte batzuk hasitako formakuntza lanaren bilakaera naturala dela: «Lurraldeko klubekin elkarlanean aritu gara, haien lana errespetatuz eta balioetsiz, eta orain beste urrats bat egin nahi dugu, Bidasoaren eragina Euskal Herri osora zabaldu nahi dugu».

Ekimen hau Euskararen Nazioarteko Egunaren bueltan kokatzen da: «‘Lurraldea gara’ gu erreferente garen herri eta hiriekin dugun lotura sendotzeko sortu da. Eskubaloia maite duen jende guztia hurbildu nahi dugu, eta, aldi berean, jende hori Bidasoara gerturatu», azpimarratu zuen Gurutz Aginagaldek aurkezpenean.