90eko hamarkadan zoramena piztu zuen Tamagotxi maskota digitalak: gose edo gaixorik bazen, edo kaka egiten bazuen, arreta eskatzen zuen; eta, zaintzen ez bazenuen, kontuz!, hil egiten zen eta. Hiru hamarkada geroago, Z belaunaldiak ere gustuko du. Bandai Namco fabrikatzaileak dio 100 milioi baino gehiago saldu dituela mundu osoan 1996an sortu zenetik, eta 30. urteurrenean, erakusketa bat ireki du Tokion. 100 jostailu onenen zerrendan sartu da, gainera, besteak beste, Legorekin eta Rubiken kuboarekin batera.