Norvegiako haurrentzako liburu ezagun batzuetan oinarrituta, “Rufus, igeri egiten ez zekien sugea” Zinema Euskaraz programaren barruan iritsi den proposamen berria da.

Uharte sekretu batean itsas sugeen komunitate bat bizi da. Han bizi da Rufus, igeri egiten ez dakien itsas munstro gaztea. Uhartea Ludovik osabak babesten du, erdi itsas munstroa eta erdi dragoia den izaki bitxiak. Baina hondamendi batek Ludoviken botereak ahultzen dituenean, Rufusek bere beldurrei aurre egin beharko die, eta bere gain hartu familia eta etxea salbatzeko ezinbesteko ardura.

Kontakizuna ez da bereziki originala, eta argumentuak ez du ezusteko handirik eskaintzen. Gabezia hori, ordea, hein handi batean, bere indar bisualarekin orekatzen du. Animazioak mundu bero, koloretsu eta xarmagarri bat eraikitzen du; itsas hondoko paisaiek eta izaki fantastikoek etengabeko abentura sentsazioa sortzen dute, eta narrazioak erritmo bizia mantentzen du hasieratik amaierara.

Filmak autoestimua, porrotaren beldurra eta familiaren babesaren garrantzia bezalako gaiak jorratzen ditu. Etxeko txikienei mezu argi eta baikorra helarazten die: beldurrak ez zaitu ahulago egiten; ausardia eta erresilientzia deskubritzeko abiapuntu izan daiteke.

Hala ere, eraikuntza dramatikoa lotuegi zaie gaur egungo animazio komertzialaren formula ezagunei. Istorioa erraz aurreikus daiteke, eta antzeko kontakizunak behin eta berriz ikusi izanaren sentsazioa uzten du.

Edonola ere, haurrei zuzendutako abentura entretenigarri eta atsegina da: bisualki erakargarria, koloretsua eta erraz jarraitzeko modukoa. Ez dio generoari ekarpen handirik egiten, baina familia osoarekin gozatzeko moduko istorio duin, samur eta atsegina eskaintzen du.