Nor dago tokiz kanpo? Joniar itsasoko Atokos uhartean, Mediterraneoko txerri beltzek agintzen dute eta turistak dira arrotzak. Irudiko protagonistak erakusten duen moduan, ur gardenetan plazerez murgiltzea ez da pertsonen kontua soilik. Giza biztanlerik gabeko uhartea biral bihurtu da sareetan, eta ontzi ugarik jo dute bertara, turistek txerriekin batera igeri egiteko. Baina txerrien erresumara doanak garbi izan behar du rolak aldatu egiten direla bertan: Atokos uhartean txerriak dira etxekoak, eta, turistak, berriz, ikusmiran doazen izaki arrotzak.