Azken boladan ahotan dabil Nathan Fielderren izena; sekulako oihartzuna izan duen “You Can See Everything” dokumentala da erantzulea. Dokumentalaren eta esperimentazio narratiboaren arteko mugan mugitzen da Fielder; gaur egungo telebistako sortzaile berezienetakoa da.

“Nathan for You” telesailean, benetako negozioak egoera gero eta absurdoagoetarako eszenatoki bihurtzen zituen. “The Rehearsal”-ekin, berriz, ideia hori beste maila batera eraman zuen: Fielderrek pertsona arruntei bizitza errealeko elkarrizketak edo egoera zailak aldez aurretik entseatzen laguntzen zien. Horretarako, agertokiak xehetasun handiz birsortzen zituen, eta gerta zitezkeen egoera eta elkarrizketa posibleak prestatzen zituen. “The Curse” lanean, berriz, umore beltza eta satira soziala uztartu zituen, sailkaezina bezain deserosoa den proposamen batean.

Aurreko lanak berritzaileak eta, neurri batean, iraultzaileak izan badira ere, estreinatzear dagoen “You Can See Everything” lanak are harrabots handiagoa sortu du. Kartzelan sartu baino 34 egun lehenago, Elizabeth Holmesek, Theranos enpresako sortzaile eta iruzur kasuaren protagonista ospetsuak, filmaketa talde bat gonbidatu zuen bere eguneroko bizitza dokumentatzera. Hasieran, erretratu intimo gisa aurkezten dena, ordea, hiru urteko bidaia harrigarri eta haluzinagarri bihurtzen da.