Astebeteko atsedenaren ostean, badator Top 14a, eta berriro ere garrantzi handiko jardunaldia izango da Avironentzat eta Biarritzentzat. Zuri-urdinak jaitsieratik kanpo daude, eta hor jarraitzeko garaipena behar dute. Biarritzek, irabazita ere, zuloan jarraituko duen arren, garaipen batek itxaropen apurrei eusteko balioko lioke.

Avironek, 18.30ean, etxean hartuko du Brive. Partida zaila izango da zuri-urdinentzat, baina baionarrak etxean oso indartsu agertzen dira, eta itxaropen horrekin jokatu nahiko dute. Neurketak, garrantzi handia hartuko du; izan ere, gaur Baionan bisitari izango den taldeak bost puntu bakarrik kentzen dizkio talde zuri-urdinari, eta Avironek garaipena lortuko balu, gutxienez puntu batera gerturatuko litzateke, eta aurkaria ere zuloan sartuko luke.

Gainera, Avironen atzetik dagoen taldeak, Oyonnaxek, Castresi egingo dio bisita, eta han irabaztea oso zaila izango du. Gaur garaipena lortzeak inork uste baino askoz ere balio handiagoa izan lezake, eta horretarako behar du Avironek zaleen babesa. Azkeneko partidan 17.000 lagunek erabat bete zituzten Jean Dauguerreko harmailak, eta gaurkoan ere betetzetik oso gertu izango da.

Avironen deialdian honako jokalari hauek sartu dira: Etrillard, Roumieu, Igiñiz, Van Rensburg, Muller, Tialata, Boutaty, Chisholm, Fa'aoso, Senekal, Haare, Fonua, Marmouyet, Monribot, Puricelli, Rouet, Brett, Lovobalavu, Rocoko, Bustos Moyano, Fuster, O'Connor, eta Spedding.

Ordu berean, Biarritzek Toulonen zelaian jokatuko du, eta ez du batere talde erraza izango aurrean. Frantziarrek liga irabazteko taldea egin dute, nahiz eta orain arte gauzak ez doazkien nahi bezain ongi. Hala ere, Sei Nazioak direla medio, baja bat baino gehiago izango du talde frantziarrak, eta horrek nolabaiteko abantailatxoa emango dio talde zuri-gorriari.

«Toulonen jokatzea beti izaten da zaila, nahiz eta agian uste bezain emaitza onak ez dituzten lortu. Azkeneko partida jokatu ez izanak ez digu batere mesederik egin, eta hiru aste nahiko txarrak pasatu ditugu. Badakigu Toulonen asko dugula jokoan, eta saiatuko gara puntuak lortzen. Agian gora abiatzeko lekurik aproposena ere izan daiteke», esan zuen Imanol Harinordokik, Biarritzeko jokalariak. «Partida hasi aurretik ezin gara galtzaile moduan joan. Baloi guztiak borrokatu behar ditugu, saiatu denetara iristen, eta galtzen badugu, gutxienez itxura ona eman», gehitu zuen Donibane Garazikoak.

Lehendik ere mailari eustea ia ezinezkoa baldin badauka, Olympiquek neurketa hau galtzen badu, are eta sakonago eroriko da zuloan, ateratzeko ia-ia itxaropenik gabe.