Larunbat eguerdi aldera Zuberoako Altzai eta Larraine herrien lurretan dagoen Harsüdürra mendia (Pic des Escaliers, 1.472 metro) GR-10 bidetik igotzen ari zela, 60 urteko emakume bat 170 metroko amildegian behera erori zen. Izoztutako plaka bat zapaldu eta irrista egin zuen, nonbait. Berarekin zihoan senarrak abisatu zituen sorospen zerbitzuak. Helikoptero baten laguntzarekin, mendiko sorosleek arratsaldeko 14.30ean aurkitu zuten jausitako emakumearen gorpua. Bikotea Pauen bizi zen, eta astebururako Iratiko Txaletetan zegoen.