Egun osorako festa antolatu dute Orion datorren larunbaterako, Eskolarteko Bertsolari Txapelketa dela-eta. 15 eta 18 urte bitarteko gazteak 11.00etatik aurrera arituko dira norgehiagoka. Arratsaldean, berriz, 15.00etan bertso-eskolen emanaldiak hasiko dira, baita erromeria ere.

Antolatzaileek atzo eman zituzten emanaldiari buruzko xehetasunak Donostian. Arabatik Peru Abarrategi (Aramaio) eta Maddalen Arrausi (Gasteiz) arituko dira; Gipuzkoatik Maider Arregi (Oñati) eta Iñigo Ibañez (Azpeitia); Bizkaitik, Asier Galazar (Muxika) eta Aitor Bizkarra (Abadiño); Lapurditik, Aitor Servier (Azkaine) eta Nahia Sasco (Lekuine); Zuberoatik Ibai Capot (Zalgize); eta Nafarroatik, Mikel Lasarte (Barañain) eta Maddalen Lopez (Lesaka).

Egin beharko dituzten ariketak honakoak dira: hasierako agurreko bertsoa, binaka ofiziozko gaian, bina bertso zortziko handian eta txikian, bakarka gaia emanda bertso bana, taldeka kopletan eta azken agurreko bertsoa.