Modurik tristeenean ospatu zuten atzo tunisiarrek herrialdearen independentziaren 59. urteurrena, asteazkeneko atenta- tuaren ondorioz.

1956ko martxoaren 20an, herrialdeko lehen presidente izango zen Habib Burgiba kolonizatzaile frantsesen aurkako borrokalariak independentzia aldarrikatu, eta Tunisiako kaleetara poza eraman zuen.

Gaurko Tunis erabat modernizatuta dago, baina atzo pozteko arrazoi gutxi eta haserre egoteko asko zuten bertakoek, besteak beste, museoaren aurkako erasoak hilzorian utzi baitu herrialdearentzat hain garrantzitsua den turismoa.

«Gaur Tunisiako bandera harro eramateko eguna da. Tunisiarrei esan behar zaie gure etorkizuna ez duela inork suntsituko», esan zuen Moez izeneko abokatu gazteak. «Tunisiak iraultza egin du eta geroztik lau urteko trantsizio zaila egin behar izan dugu. Ezin dugu onartu inork gure iraultza lapurtzea; lanean jarraitu behar dugu».

Rafik Shely Estatu idazkariak jakinarazi du bi jihadistak, Jasin Abidi eta Hatem Jaxnaui, legez kontra irten zirela abenduan Tunisiatik Libiara joateko. Bertan ikasi zuten armak nola erabili, itzuli aurretik. «Ez dauzkagu xehetasun guztiak, baina badakigu tunisiarrentzat propio prestatutako entrenamendu ere- muak dituztela Sabrathan, Bengasin eta Dernan», erantsi zuen.

Makina bat begiralek esandakoa baieztatu dute Tunisiako agintariek: jihadisten gotorleku bihurtu dela Libia.

Herrialde horretako egoera aztergai izan zuten atzo Europar Batasuneko estatu eta gobernu buruek. Tunisiarekin batera «terrorismoaren aurkako elkarlanean» jarraitzeko konpromisoa adierazi zuten agintariek, eta agindu zuten herrialdean batasun gobernu bat osatuz gero, Bruselak bere laguntza osoa emango liokeela, egonkortasuna berreskuratze aldera.

Agenterik ez Parlamentuan

Asteazkeneko atentatuaren gaineko ikerketak Habib Esid lehen ministroak berak onartzen dituen segurtasun arazoak azaleratu ditu. Esaterako, museoa Parlamentutik gertuegi dago.

Abdelfatah Mourou Parlamentuko presidenteordeak, berriz, erasoa egin zutenean ganbera zaintzeko inor ez zegoela bertan jakinarazi du. Lau agente zeuden teorian lan hori egiteko, baina horietako bi «kafea hartzen» ari ziren, hirugarrena bazkaltzera joana zen eta bestea egun horretan ez zen joan lanera. «Sekulako akatsa izan zen», onartu du.

Horrelakorik ez zuen aipatu Beyi Caid Esebsi presidenteak arratsaldean eskaini zuen hitzaldian. Independentziaren egunean, oraindik «Estatu demokratiko baten oinarriak» eraikitzen ari direla adierazi zuen, eta ezinbestekotzat jo zuen tunisiar guztiek bat egitea.