Aralarren iritziz, ETAren azken agiriak «zerbaitetarako balio baldin badu, bake prozesuaren itzulezintasuna berresteko da».

«ETAren agiriak, azken agirien bidetik, abian dagoen prozesuak atzera bueltarik ez duela erakusten du», nabarmendu du ohar batean.

Alderdi horren ustez, horrek «balio beharko luke eta nahiko berme izan beharko litzateke Espainiako eta Frantziako gobernuek mugiarazteko, inongo kontraprestaziorik gabe», eta «urratsak ematen hasteko, besteak beste Aieteko Bake Konferentziako ondorioei baikorki erantzunez».

Era berean, alderdien arteko «salbuespenik gabeko elkarrizketa» abian jartzeko ere balio beharko lukeela deritzo, «normalizazio politiko eta sozialaren bidean, giza eskubideetan eta berdintasunean oinarrituta».