NAIZ
IRUÑEA

Azaroaren 8an Iruñeko kaleak «laranjaz blaitzeko» deia egin du Herri Harresiak

Audientzia Nazional espainolean epaitzen ari diren 28 gazteen absoluzioa eskatu eta epaiketa politiko gehiagorik egin ez dadila galdegiteko, Iruñerriko Herri Harresiak mobilizazioa egingo du Iruñean, azaroaren 8an, Antoniuttitik abiatuta.

Iruñerriko Herri Harresiaren agerraldia, Katakraken. (Jagoba MANTEROLA/ARGAZKI PRESS)
Iruñerriko Herri Harresiaren agerraldia, Katakraken. (Jagoba MANTEROLA/ARGAZKI PRESS)

Iruñean eginiko agerraldi batean, Iruñerriko herri harresiek datorren azaroaren 8ko mobilizaziorako deialdiaren berri eman dute.

Hitzordua arratsaldeko 17.30ean abiatuko da, Antoniuttitik, eta goiburua «Laranjaz blaitu. Askatasun eta eskubide zibilen alde. Epaiketa politikorik ez. #28akereLIBRE» izango da.

Iruñerriko herri harresiak egin du deialdia, eta Nafarroako gainerako herri harresiei ere gonbitea egin diete zitarekin bat egin dezaten.

«Dei bat da, aktibazio pertsonalerako, elkartasunerako eta konpromisorako, egoera hauek desager daitezen», nabarmendu dute.

Azaroaren 8an, esan dutenez, «milaka pertsona laranjaz blaituko gara 28 gazte horien eta sumario politikoetan auzipetuta dauden guztien askatasuna eskatzeko».

Segiko kide izatea egotzita Audientzia Nazionalean epaitzen ari diren 28 gazteetatik 9 Iruñerrikoak direla azpimarratu dute.

Maiatzean absolbitu zituzten 40 gazteen kasua aipatu ondoren, epaiketa hau «guztiz zentzugabea» dela argi utzi nahi izan dute, eta gaineratu epai bakarra egon daitekeela: «absoluzioa».