Bigarren urtea da Nafarroaren Eguna ospatu gabe geratzen dela, osasun egoerak hala behartuta. Nola hartu duzue Basaizea elkarteko kideek bigarren urtez antolakuntza bertan behera utzi beharra? Erabaki gogorra izan al da?

Bai, aitortu beharra da etsipen handia izan dela berriz ere Nafarroaren Eguna eta Kulturaldia bertan behera utzi behar izana... Iazkoa, salbuespeneko egoera batean kokatu genuen, baina aurtengoa ezeztatzeak dezepzio handiagoa sortu du.
Egia esan, urte hastapenetik geure burua prestatu genuen gerta zitekeen egoera honetara. Frantziar Estatuak kulturarekiko duen postura ikusita, ez gaitu harritu, urte osoa iragan baitugu ekitaldiak antolatzen eta atzetik ezeztatzen... Honetan ere, garaiz biltzen hasi ginen, xumeki balitz ere, Nafarroaren Eguna eta Kulturaldia antolatzeko. Baina, azken asteetan inposatu diguten konfinamendu berriarekin, itxaropen guziak airatu zaizkigu eta aurten berriz ere gure elkartearentzat besta egun handiena ezeztatzea erabaki dugu. Erabaki gogorra izan da bai, baina espero dugu azken etenaldia izatea...

2020an ekimen anitz egin ziren hedabide eta sare sozialen bitartez ospakizuna gogoratzeko. Aurten ere horrelakorik espero al duzue?

Pentsatzen dut jende askorentzat Nafarroaren Eguna ezeztatzeak bihotzean ximiko bat piztuko duela... Azkenean, nafartar eta euskal herritar askorentzat egun hau hitzordu saihetsezina bihurtu baita. Gutariko askorentzat hutsune bat geldituko da. Baina 2020an mobilizazio handia izan bazen sare sozialetan eguna gogoratzeko, aurtengo egoera desberdina da. Badu orain urte bat Euskal Herriko ekitaldi esanguratsuenak bertan behera gelditu direla, eta lehengo biziarekin konparatuz erdizka bizitze honek apur bat indarrik gabe uzten gaitu eta gizartean nekea nagusitzen dela nabari da. Jendeari luze egiten ari zaio egoera, elkarte eta herri dinamika paralizatzen ari den ere beldurra daukat (batez ere, Iparraldean), azkenean pasibotasunera behartuak baikara. Hala ere,  pentsatzen dut jende askok egun hau oroitu nahiko duela sare sozialetan edo hedabideetan Nafarroaren Egunari edo Basaizeari begi kliska bat eginez! Argi da baigorriarrok egun hau besta egun handi bat bezala bizi dugula eta informalki ospatuko dela familia askotan.

Igande honetarako ez, baina maiatzerako zerbait antolatzeko asmoa baduzue. Ekitaldi horiek unean uneko osasun egoeraren arabera antolatu beharko badira ere, aurreratzerik izango zenuke zer motatako ekitaldiak edota zer filosofiarekin antolatuko diren?

Berez apirileko Kulturaldian programatu genituen ekitaldiak, egoera sanitarioak ahalbidetzen badu, maiatzetik aurrera pixkanaka-pixkanaka, gauzatzeko asmoa daukagu. Mota ainitzetako ekitaldiak proposatzea pentsatua genuen maiatzean; Josu Martinezen “Subandila” filma eta bi liburu aurkezpen (Koldo Zuazo eta Dominique Campistron) proposatzeko asmoa genuke. Ekainaren 4an, aldiz, Axut konpainiaren “Amua” antzerkia eskaintzeko gogoa dugu. Ekain bukaeran Ruper Ordorikaren kontzertu bat antolatu nahi genuke aire librean. Hau iazko kulturaldian programatu genuen baina, noski, bertan behera gelditu zen. Ekainean, «mugan bizitzea» gaiaren inguruan mintzaldi bat antolatzeko xedea daukagu, «muga» errealitate duten herrialdeetako populakuntzekin harremanetan (Katalunia, Irlanda, Kurdistan...). Horrez gain, aurten Nafarroaren Eguna ospatzen ez badugu ere, berantago urtean zehar bazkari bat antolatu nahi genuke egun horretan elkartzen diren nafartarrak gonbidatuz.

Hurrengo urteetan ere sare sozialek leku handiagoa izango dute Nafarroaren Egunean?

Argi da gaur egun sare sozialen aroan murgilduta gaudela eta komunikaziorako tresna paregabeak direla jendeengana heltzeko. Badu urte pare bat hasi ginela tresna horiek serioski erabili nahian eta etorkizunean oraindik zabalago erabiltzen saiatuko gara.