Baionako karriketan ibiltzean street art-eko artistak atzeman daitezke txoko batean eta bestean, ingurumenarekin bat egiten duten obrak sortzen. Points de Vue festibalak igandea bitarte prestatu duen programazioaren baitan egiten ari diren obrak eta aurreko lau edizioetan egindakoak ikusteko bisita gidatuak antolatu ditu, baina ez soilik programazio anitza eta aberatsa prestatu baitute antolatzaileek. Aurtengo berezitasun nagusia jaialdiaren hedapena da, Ipar Euskal Herriko beste tokietara ere zabaldu delako.

Egunotan Baiona Ttipian zehar ibiltzean Piet Rodriguez eliza pareko horma batean aitatxi baten portetra nola egiten ari den ikus daiteke, berarekin hitz egiteko parada ere bada, bisitan joan zaizkion bisita gidatuetan parte hartzen ari diren pertsonek egiten duten bezala.

Bere hitzetan jaialdiak xede duen ezaugarriak atzeman daitezke, izan ere obra bertako kulturarekin bat egin duelako: «Ailegatu nintzelarik ideia bat neukan, baina Xingarraren feria ondoan ospatzen ari zenez, ezin izan nintzen hasi. Beraz egun horiek tokiaren edertasuna eta bertako jendea ezagutzeko baliatu nituen. Denbora horretan, margotzen ari naizen Baionako aitatxi hori ezagutu nuen, eta ingurumena ezagututa hori egitea deliberatu nuen».

Margolari belgiarrak aurpegiak margotzea maite duela adierazi du: «Jende gehiena obra ikustera etortzen denean hortz bat falta zaiola ikusten du, baina nik ez dut hori ikusten, bere aurpegian agertzen den espresioa maite dut, bere zimurrekin istorio bat kontatzen digu».

Atzerriko margolariak Euskal Herriarekin bat egiten

Jaialdiarekin bilatzen dutenarekin bat egiten duela baieztatu du Alban Morlot antolatzaileak: «Nahi dutena egiten uzten diet, baina hasieran Euskal Herrian daudela eta tokia zehazki zein den azaltzen diet. Auzoa nolakoa den, nolako jendea bizi den, eraikina nolakoa den… azaltzen diet. Pietek egun batzuz ezin izan zuenez margotu, denbora horretan ezagutzan sakontzeko parada izan zuen, eta hori bere obran ikus dezakegu».

Orotara zortzi obra egingo dira, zazpi egunotan egiten ari dira, eta zortzigarrena igandetik aurrera izanen da. Piet Rodriguezekin batera, Spear, Taquen, Rouge, Mr Sor 2, Aurelie Andres, Stom500 eta Mural Studioren eskutik helduko dira beste obrak. Toki ezberdinetatik beraien burua aurkeztu duten artisten artean gein du selekzioa Morlotek.

Baionako karrikak artez betetzen ari da Points de Vue #streetart festibalari esker. Gaurtik eta igandera bitarte, artistak hirian zehar haiek lanak sortzen ikus daitezke @naiz_info pic.twitter.com/Dv6seGD0mp

— Idoia Eraso (@idoia_eraso) October 20, 2021

Jaialdia bera igandean amaituko bada ere, beste ekimen batzuk ere izanen dira hamabost egunez. Eta denboran bezala, espazioan ere zabalduko da jaialdia, lehen aldiz hiriburuko mugetatik kanpo aterako baita, Donapaleu, Urruña eta Hendaiara zabaltzeko. «Hasieratik nire xedea proiektua Ipar Euskal Herriko lurralde guztian zehar hedatzea izan da, baina erakundeen banaketa dela eta ez zen erreza. Aurten lehen aldiz Euskal Elkargoarekin batera antolatu dugu, eta horri esker beste tokietan ere bagaude».

Street art-a herriekin lotzeko ohitura ez dagoela eta, Morlotek justuki bestela ikusteko era ere badagoela dio: «Oso ondo elkartzen dira, bertan dagoen ondarearekin bat egiten du, eta bizitzeko dagoen beste era batekin elkartuta ekarpen handia egin dezake. Elkarbizitza sustatu nahi dugu».

Lau urteko ondarea

Arte mota horrek ekartzen duena eta jaialdiak horretan izan duen eragina nabarmendu du Xabxab artistak. «Jaialdiak ekarpen handia egin du street art-aren onarpenean. Nik lanetan dauden eraikinetan jartzen diren egurrezko hormetan egiten ditut nire obrak, eta hasieran jendearengandik oihartzun txarrak izango nituela uste nuen, baina justu kontrakoa izan da, eta ziur nago duela bost urte, jaialdia hasi baino lehen ez zela horrela izango».

Baiona Ttipian kokatu du Points de Vue festibalak bere elkargunea, haurrek beraien #streetart-a egin dezakete, hirian zehar artista ezagunak ari diren bitartean.
Margolarien tamaina txikiko obrak ikusteko eta haiekin ikastaroak egiteko parada ere bada. @VilleDeBayonne @naiz_info pic.twitter.com/QVvIzrP4ML

— Idoia Eraso (@idoia_eraso) October 20, 2021

Jendearengan bere lanek sortu duten interesa oso atsegina dela azpimarratu du, eta bide horretan jaialdiak eman duen ezagutzari esker bere lana beste artista batzuenarekin ere konparatzen dutela gaineratu du. Jaialdi denboratik kanpo ere, gune ezberdinak ikustera joan ahal izateko mapa ezarri du sarean jaialdiak.

Jaialdiak erdigune duen herrixkan erakusten ditu tamaina txikiko obrak Xabxabek, eta aldi berean igandean ikastaro bat ere emango du dohainik bertara hurbildu nahi duen orori. Bertan, skate taulen gainean boligrafoarekin egiten dituen margoen ondoan, beste hainbat artistenak ere ikus daitezke, eta haiek ere han ari dira ikastaroak ematen.

Herrixkaren sarreran egurrezko bi horma handi jarri dituzte, beran nahi duen orok bere artea adierazi dezan. Spraiak ere ematen dizkiete, eta gehienetan haurrak ikus daitezke koloreekin jolasten. Ostatua ere badago, eta ostiralean eta larunbatean kontzertuak ere izanen dira.