Ikerlan zentro teknologikoak maximo historikoa lortu zuen 2022an. Ostegun honetan jakinarazi duenez, guztira 28 milioi euroko diru sarrerak izan zituen, eta enpresen fakturazioa nabarmen handitu zen. Emaitza horien berri eman da Ikerlanek ostegun honetan Arrasateko Amaia Antzokian egin duen urteko batzarrean. 2021ean lortutako errekorra (25 milioi) gainditu zuen iaz.

Bigarren urtez jarraian, lehiakortasunerako «funtsezkoak» jotzen dituen esparruetan (zibersegurtasuna, adimen artifiziala, robotika eta automatizazio industriala edo energia elektrikoaren metaketa) teknologia-transferentzia arloa bi digitu hazi zen, 13,8 milioi euroraino, 2021ean baino %11,2 gehiago.

Beste mugarria langile kopuruan ezarri zuela nabarmendu du Ion Etxebarria zuzendari nagusiak. 400 pertsona baino gehiagoko taldea finkatu zuen. «Egungo egoera konplexua den arren, oro har urte positiboa izan dela langileen erakarpen, fidelizazio eta sendotzearen ikuspegitik, batez ere gure harrobitik lortutako emaitzei, kanpoko talentua sartzeari (langileen %30) eta lan malgutasuneko neurriak garatzeari esker».

Era berean, ekipamenduan egindako «inbertsio handia» nabarmendu du Etxebarriak, baita azpiegituretan eta prestakuntzan. Guztira, 4 milioi euro inbertitu zituen. «Digilab abian jartzea, juniorren harrobiaren eta ikertzaileen prestakuntzaren aldeko apustua» nabarmendu dituzte.

170 enpresarekin lan

Erakundeko zuzendari nagusiak nabarmendu duenez, «enpresekin egindako kontratuen fakturazioa globalaren erdia baino gehiago da, eta horrek esan nahi du gure plan estrategikoarekin koherenteak garela eta enpresei teknologia eta merkatu erronketan laguntzen jarraitzen dugula». Urtean zehar, zentroak 170 enpresa baino gehiagorekin egin dutela lan azpimarratu du.

Horrez gain, Ikerlanek ikerketa programa publikoetan 12,9 milioi euroko diru sarrerak izan zituela aipatu du. «Horri esker, teknologia lortzeko eta garatzeko jarduerak indartzen jarraitu dugu, gero enpresei transferitzeko».

«Urte bikainaren» amaiera gisa, 2022an Ikerlanek zibersegurtasunaren esparruan spin off berri bat sortzeko oinarriak ezarri zituela azaldu du, «produktu industrial elektronikoetako ahultasunak aztertzeko zerbitzu aitzindariak eskaintzeko, eta gaian erreferentea izateko Europako hegoaldean».