Alberto Martinez Lakuako Osasun sailburuak nabarmendu duenez, Osakidetzak martxan jarritako kontingentzia-planak egoki funtzionatu du argindar etenaldi zabalean. Larri dauden gaixo guztiak ospitaleetan artatu dituzte eta anbulatorietan egitekoak ziren ebakuntza batzuk baino ez dira atzeratu.

Martinezek Radio Euskadiri eginiko adierazpenetan azaldu duenez, Europa Pressek jakinarazi duenez, kontingentzia planak Osakidetzako sorgailu sistema guztiak ospitale guztietan martxan jarri izana ekarri du, «inongo gorabeherarik gabe, eta paziente kritiko guztien arreta bermatuz» Zainketa Intentsiboko eta Bizkortze unitateetan, baita ebakuntzak egiten ari ziren geletan ere.

Hala ere, «zuhurtziaz jokatuz, ospitale batzuetan anbulatorioko ebakuntza batzuk atzeratzea erabaki zuten», aipatu du sailburuak. Artatu behar zituzten hainbat lagunekin harremanetan jartzeko zailtasunak izan ziren, gainera, telefono arazoak tarteko.

Mari Luz Marques Osakidetzako Gurutzetako zuzendari gerenteak langilegoaren «konpromisoa» nabarmendu du Radio Euskadiri egindako adierazpenetan. Aurretik eginiko simulakroak ere oso lagungarriak izan zirela esan du. Talde elektrogenoen funtzionamendua egokia izan zen.

«Kalean gertatzen zenagatik kezka izan genuen», aitortu du Marquesek Radio Euskadin. Besteak beste, errepideetan eta gainerako garraiobideetan zeuden arazoak lan taldeak betetzeko oztopo bilakatuko ote ziren beldur ziren, baina ez zen gero arazorik izan alde horretatik. Lan jarduna luzatu behar izan zutenek egin zuten, lankideak iritsi arte.

Gasoleoa ekarri zuen Ertzaintzak Bilboko portutik Gurutzetako ospitalera, bertan zeuden erreserbak handitzeko, Marquesek erantsi duenez. Erietxeen barruan kontsumoa ahalik eta gehien murrizteko aholkua eman zuten.

Nafarroan ere, arazo larririk gabe

Amparo Lopez, Nafarroako Gobernuko Barne kontseilariak, astelehen honetan azaldu zuenez, ospitaleen eremuan, «delikatuena izan daitekeena», itzalaldia gertatu denean ebakuntza kirurgikoekin normaltasunez jarraitu ahal izan zuten talde elektrogenoei esker. ZIUetako arretaren jarraitutasuna, dialisi-sistemak eta larrialdiak lehenetsi dira.

Tuterako eta Lizarrako ospitaleak sistema elektrogenoekin funtzionatu zuten, eta Nafarroako Unibertsitate Ospitalea normaltasunera itzuli zen astelehen arratsaldean bertan. Lopezek nabarmendu zuenez, zuhurtziagatik, arratsaldeko ebakuntza kirurgikoak bertan behera geratu ziren.

Gainera, itzalaldia gertatu zenean laguntza behar zuten pertsonak identifikatu ziren. Adibidez, etxean arnasgailu bat erabiltzen dutenak. Gobernuak baieztatu duenez, arratsaldean zehar denek jaso zuten laguntza. Era berean, oxigenoterapia-sistemak dituzten anbulantzien gailu berezi bat eratu zen.

Astearte honetarako osasun-zentroak ere irekita egongo dira, baina ebakuntza kirurgikoak eta premiazkoak ez diren probak desprogramatuko dira.