Hemen da, azkenik, irundarrek aspalditik itxaroten ari ziren hilabetea. Ekaina oso garrantzitsua izaten da bertako herritzarrentzat. Irungo festei, ekainaren 30ean Alardearen egun handiaz biribilduta, beste ekitaldi ikusgarri bat gehituko zaie asteburu honetan: eskubaloiko Kopako fase finala. Nola ez, bertan hiriko taldea ere egongo da: Bidasoa Irun. Eta Kopaz gain, beste sari bat ere dago jokoan: Europarako txartela.

Gipuzkoarrek ahalik eta hobekien amaitu nahi dute denboraldi gogor eta luze hau. Liga, Espainiako Kopa eta Europa izan dute jokoan, eta orain Kopari ekingo diote. Asobalen ez dute Europan lehiatzeko sailkapen zuzena lortu eta, horretarako, 'etxeko' Kopa irabazi beharko lukete; edo, beste aukeren artean, txapeldunorde amaitu. Beste hirugarren aukera bat ere badago: Barçak irabaztea eta dagoeneko txartela duen Torrelavegak txapeldunorde amaitzea.

朗¡Irun se viste de gala para la #CopaRey2025!#AupaBidasoa #EtorkizuneraBegira pic.twitter.com/wFp5EwtR08

— CD Bidasoa Irun (@CDBidasoaIrun) June 4, 2025

Kirol arloari eutsiz, inoiz baino orekatuagoa dator azken fase hau. Hori bai, Barça ahalguztidunak faborito bezala hasiko du txapelketa eta Bidasoak finalean bakarrik izango luke aurkari talde katalana. Horretarako, Jacobo Cuetara Bidasoako entrenatzaile ohiaren Torrelavegari irabazi behar dio lehenik final-laurdenetan, ondoren finalerdietan beste aukera bat izateko finalera iristeko.

Denboraldiaren azken asteetan ikusitakoaren arabera, Bidasoa ez da momenturik onenean iristen. Baina anfitrioia da, eta horrek beti ematen du indar gehigarri bat. Artalekuko sarrerak aspaldi agortu ziren eta, beraz, etxeko zale ugari izango dituzte animatzen harmailetan.

Bidasoa eta Torrelavegaren arteko lehia 20.45ean izango da (ETB4-k zuzenean eskainiko du). Partida honetako garailea Bigarren Mailako Alcobendas eta Ademar Leon (16.00) partidaren irabazlearekin lehiatuko da larunbatean, finalerdietan (17.00etan edo 19.30ean). Kuadroaren beste aldean, Logroño La Rioja-Bada Huesca (13.00etan) eta Barça-Valladolid (18.30ean) partidak izango dira. Finala igandean izango da, 18.00etatik aurrera.