Estatuko Aldizkari Ofizialak (EAO) ostegun honetan EAEko merkatu erresidentzial tentsionatu gisa izendatutako eremu berriak jasotzen dituen ebazpena argitaratu du, eta horrek neurriak abiarazten ditu udalerri horietan alokairuen prezioei muga jartzeko: Bilbo, Gasteiz, Astigarraga eta Usurbil. Konkretuki, alokairu-kontratuen berrikuspena ezingo da %2,22 baino gehiago garestitu.

Ebazpenak lau udalerri hauen lurralde osoa hartzen du, Arabako hiriburuko hirigunean sartzen ez diren toki entitate txikiek osatutako landa eremua izan ezik.

EAOn deklarazioa argitaratuta, hemendik aurrera udalerri hauetan sinatuko diren etxebizitza alokairu kontratu berriak aurreko kontratuaren prezioari erreferentziatuta egon beharko dira, igoera neurrigabeak saihestuz.

Gainera, administrazio publikoek premiazko neurri plan bat garatzeko betebeharra ezartzen da, alokairuaren eskaintza handitzeko eta hiru urteko epean alokairu merkatuaren egoera irauli ahal izateko.

Gaur izendatutakoez gain, orain arte Hego Euskal Herrian merkatu tentsionatu gisa izendatu diren udalerriak hauek izan dira: Donostia, Errenteria, Irun, Zumaia, Lasarte-Oria, Barakaldo, Iruñea, Tutera, Eguesibar, Burlata, Barañain, Zizur Nagusia, Lizarra, Aranguren, Berriozar, Tafalla, Antsoain, Atarrabia, Korella, Elortzibar, Zintruenigo, Baztan, Altsasu, Uharte, Berriobeiti, San Adrian eta Azkoien.

Neurri honek alokairuen prezioen hazkundea mugatzea dakar, eta espainiar Gobernuak ostegun honetan gogorarazi du Katalunian neurria ezarri zenetik jasotako datuek erakusten dutela «funtzionatzen duela», izan ere, lehen urtean %4,9 jaitsi ziren kontratuen prezioak eremu tentsionatuetan, eta 11.000 alokairu kontratu berri baino gehiago sinatu ziren.

Denis Itxaso: «Neurriak hartzen jarraituko dugu»

Denis Itxaso Etxebizitza eta Hiri Agendako sailburuak gaur Gasteizko Udaleko Prentsa Aretoan egindako ekitaldian azpimarratu du «oso garrantzitsua» dela egiturazko neurriak hartzea etxebizitza-merkatua orekatu ahal izateko.

Azaldu duenez, «eskaintzaren eta eskariaren arteko desoreka hori —bai erosketan, bai alokairuan— lurzoruak mobilizatzeko eta etxebizitza gehiago eraikitzeko gai bagara baino ez da aldatuko».

Hala ere, onartu du helburu horrek denbora eta planifikazioa behar dituela, eta gaineratu du Lakuako Gobernuak bien bitartean alokairuaren merkatuari egonkortasuna emango dioten jarduketak bultzatzen jarraituko duela.

Ildo horretan, Itxasok nabarmendu duenez, «helburu hori egungoak baino epe zentzuzkoagoetan lortzen dugun bitartean, alokairuari segurtasun eta arrazionaltasun handiagoa emateko neurriak hartzen jarraituko dugu, bai maizterrentzat, bai jabeentzat».

«Kontratuetako prezioak mugatzearen bidez egingo dugu, etxebizitzen bitartekaritza publikorako Bizigune programaren bidez, pizgarri fiskalen bidez, eta orain, 2026ko berrikuntza gisa, alokairu seguru publikorako programa berri baten bidez. Ekimen horrek ez-ordaintzeak eta balizko kalteak estaliko dizkie jabeei, beren pisuaren errenta erreferentziako prezioen indizearen tartearen barruan badute», azaldu du.

Bestalde, Maider Etxebarria Gasteizko alkateak azaldu du orain «posible izango dela politika publiko sorta bat aplikatzea, merkatuaren disfuntzioak zuzentzeko eta etxebizitza eskuragarrien eskaintza handitzeko».

Era berean, Arabako hiriburuan etxebizitza eskuratzeko gero eta zailtasun gehiago daudela eta, ausardiaz jokatu behar dela aldarrikatu du Etxebarriak.