Gutxienez 20 palestinar hil eta 83 baino gehiago zauritu dira larunbat honetan Israelek Gazako Zerrendan egindako hainbat erasoren ondorioz, Gazako Osasun Ministerioaren balantze ofizialaren arabera. Israelek Hamasek Lerro Horian egindako eraso batekin «su-etena urratu» duela salatu du, eta, errepresalia gisa, Gazako Zerrendan taldearen ustezko helburuen aurkako zenbait eraso egin dituela baieztatu du.

«Gaur arratsaldeko erasoetan Gazako Zerrendako ospitaleetan artatutako hildakoen eta zaurituen aurretiazko kopurua: 20 hildako eta 83 zauritu baino gehiago, kasu kritikoak barne», jakinarazi du Ministerioak ohar ofizial batean. Palestinako hedabideek 22ra igo dituzte hildakoak, osasun iturriak aipatuta.

Aitzakia bera erabilita egindako mota honetako laugarren bonbardaketa oldea da gaurkoa, urriaren 10ean su-etena indarrean jarri zenetik.

Hona hemen Israelek 200 hildako baino gehiago utziz su-etena hautsi duen lau egun horietako gertaeren deskribapena; lehenengo bi aldietan, erosoen ostean su-etena berriro ezartzen zuela iragarri zuen.

Urriaren 19a

AEBk babestutako su-etena indarrean sartu eta bederatzi egunera, behin Gazan bizirik jarraitzen zuten azken hogei bahituak aske geratu ondoren, urriaren 19an, igandea, Israelek bonbardaketak egin zituen Zerrenda osoan, Hamaseko milizianoek Rafahn beren tropei eraso egin zietela salatu ondoren.

Uste da Zerrendaren hegoaldeko muturrean, Israelek erabat kontrolatzen duena, oraindik miliziano palestinarrak geratzen direla tuneletan ezkutatuta. Aldiz, Israelek ez die Gazatik irteteko pasabide segururik bermatu.

Talde islamistak su-etenarekin konprometituta dagoela esan du, eta bere beso militarrak bi soldadu israeldarren heriotza ekarri zuen erasoarekin zerikusirik ez duela nabarmendu du; azaldu duenez, eremuan zeuden milizianoekin komunikazioa galdu du, eta ez daki bizirik jarraitzen duten ere.

Bonbardaketen ondorioz, 45 pertsona hil ziren, Zerrendako Osasun Ministerioaren zenbaketaren arabera. Gauean, Israelgo Armadak su-etenari berriro ekingo ziola iragarri zuen.

Eraso horien ondoren, Donald Trump AEBko presidenteak azpimarratu zuen su-etenak indarrean jarraitzen zuela, eta hurrengo egunetan AEBko hainbat goi-kargudun, tartean Marco Rubio Estatu idazkaria, Israelera joan ziren hitzartutakoa betetzen ari zirela ikuskatzera.

Urriaren 28a

Astearte goiz horretan, Israelek berriro leporatu zion Hamasi Rafahn bere tropei eraso egin izana, soldadu baten heriotza eragin zuten enfrentamenduekin lotuta. Palestinako mugimendu islamistak berriro esan zuen ez zela erasoaren erantzulea, eta su-etenarekiko konpromisoa azpimarratu zuen.

Benjamin Netanyahu Israelgo lehen ministroak «Gazako Zerrendan eraso gogorrak» egiteko agindu zion Armadari. Trumpek erasoak babestu zituen, esanez Israelek «erantzun egin beharra» zuela bere soldaduetako bat hiltzen zutenean, eta su-etena arriskuan ez zela azpimarratu zuen.

Israelen erasoek hamabi ordu baino gehiago iraun zuten eta 104 hildako utzi zituzten, tartean 46 adingabe. Hurrengo goizean, Israelek berriro su-etena ezartzen zuela iragarri zuen.

Azaroaren 19a

Asteazken honetan, Israelgo Armadak adierazi zuen «hainbat terroristak» bere tropen aurka tiro egin zutela Jan Yunisen, Gazako hegoaldean, eta ez zela inor zauritu. Berehala jakinarazi zuen «Gazako Zerrenda osoan Hamasen helburu terroristak» erasotzen hasiko zela.

Hamasek inolako erasorik egin izana ukatu zuen, eta AEBko Gobernuari eskatu zion «presio irmoa eta berehalakoa» egiteko Israel su-etena errespetatzera behartzeko.

Asteazkeneko erasoetan, Israelek 32 pertsona hil zituen, 12 adingabeak, Gazako Osasun zerbitzuen arabera. Beste bi aldietan ez bezala, Israelek ez zuen jakinarazi su-etena berriro ezartzen zuenik behin bonbardaketak amaitu ondoren.

Azaroaren 22a

Larunbat arratsalde honetan, azkenik, Israelgo Armadak eraso oldea egin du berriro, salatu ostean «terrorista armatu batek» tropa israeldarrek ezarritako Lerro Horia zeharkatu eta Gaza hegoaldean soldaduen aurka tiro egin zuela. Oraingoan ere ez da israeldarrik zauritu.

«Erantzun gisa, FDI Israelgo Defentsa Indarrak Hamas erakunde terroristaren helburuei eraso egiten hasi dira Gazako Zerrenda osoan», adierazi du ohar batean Armadak.

Netanyahuren bulegoak su-etenaren urraketatzat jo du gertatutakoa, eta bere tropek Rafahn Hamaseko goi mailako bost kide hil dituztela jakinarazi du.