Lehen aldiz taularatu zuten barkoxtarrek, iragan uztailaren 27an, Ürrats kolektiboak pastorala. (Guillaume FAUVEAU)
Emanaldia aire librean izan zen, herriko plazaren ondoan den pentzean, 2.000 ikusle baino gehiagoren aitzinean. (Guillaume FAUVEAU)
Euskal Herriko borroka kolektiboen ibilbidea jorratu zuen, 60ko hamarkadatik gaur arte. (Guillaume FAUVEAU)
Antolaketa zorrotza ezarri zuen agerian lehen emanaldiak. (Guillaume FAUVEAU)
75 heldu baino gehiagok eta hamar bat haurrek hartu dute parte antzezlan honetan. (Guillaume FAUVEAU)
Berrikuntza, besteak beste, lanaren gibelean diren pertsonen gaztetasunean datza, bai idazketan eta bai zuzendaritzan. (Guillaume FAUVEAU)
Proposamena berritzailea izateagatik ezaugarritzen bada ere, pastoralaren kodeak errespetatu dituzte. (Guillaume FAUVEAU)
Egileen gehiengoak lehen aldikoz idatzi du pastoral bat, eta horretarako, dokumentazio lan sakon bat eraman du aitzinera. (Guillaume FAUVEAU)
Testuaren koherentzia eta batasuna atxikiz, bakoitzaren begirada eta sentsibilitateak uztartzea izan dute erronka. (Guillaume FAUVEAU)
Frankismoaren garaian Enbataren sortzetik Bake Bidea-ra arte, tokiko borrokak azaleratu dituzte Barkoxe eta inguruko herritarrek. (Guillaume FAUVEAU)
Pastoralaren ohiko moldeak hautsiz, kontakizuna pertsonaia historiko jakin batean zentratu ordez, egile gazteek itzalean lan egin duten emazte eta gizonenak lehen lerroan ezarri dituzte. (Guillaume FAUVEAU)
Obraren agerraldi eta kantuen idazketa kolektiboa izan da, zazpi herritarren artean banatua, hain zuzen ere. (Guillaume FAUVEAU)
Pastoralaren ondoko emanaldiak agorrilaren 2an (20:30ean) eta 10ean (15:30ean) iraganen dira. (Guillaume FAUVEAU)
Barkoxeko pastorala, herri baten dinamika kolektiboa
Etxahun elkarteak antolatuta, uztailaren 27an, igandez, Barkoxen taularatu zuten herritarrek prestaturiko pastoral berritzailea. 2.000 ikusle baino gehiagok, Euskal Herriko hamaika txokotatik heldutakoak, Ürrats Kolektiboak pastoralaren lehen emanaldiaren lekuko zuzenak izan ziren.
Emanaldi berriak iragarriak dira agorrilaren 2an, iluntzean, eta hilaren 10ean, arratsaldez.
Sartzeak Mauleko Xirikota esne-dendan, Barkoxeko Garat okindegian, Atharratzeko Vival dendan eta Etxahun elkartearen HelloAsso webgunean eskuratu daitezke.
2025 UZT. 30
