Naiz.info
Milán

Juventusek Fernando Llorente begiz jo du

Turingo Juventus Fernando Llorenteren fitxaketa aztertzen ari da eta Athleticekin harremanetan jartzeko asmoa agertu du.

Sky Sport24 irrati italiarrean egin ditu adierazpen horiek Juventuseko kirol zuzendari Giuseppe Marottak. Bere iritziz, Llorente «jokalari interesgarria» da taldea indartzeko.

«Llorente ziurrenik jokalari interesgarria izango da, baina jokalariaren eskubideak dituen taldea errespetatu behar dugu. Egoera aztertzen ari gara eta Athleticekin harremanetan jar gaitezke», esan du.

«Udarako hainbat helburu genituen begi bistan, baina talde batzuek ez dituzte merkaturatu gure interesekoak ziren hainbat jokalari eta beste batzuek diru zifra altuak eskatzen dituzte haien fitxaketengatik», gaineratu du Marottak.

Kirol zuzendariak esan duenez, beren helburua taldea «kualitatiboki indartzea» da, batez ere aurrekaldea, baina taldean dauden jokalariak mantenduz.