Jon Azpillaga bertsolaria atzo goizean zendu zen 81 urte zituela eta azken agurra gaur jasoko du, 19.00etan, Mutrikun, Bertsozale.eus agerkari digitalak aurreratu duenez.

1935. urtean Pasaian jaio bazen ere, umetatik Berriatura joan eta Mutrikun bizi izan zen 1960. urteaz geroztik.

Bertsozaletik nabarmendu dute «bertso munduari asko emandako pertsona» zela. Hala, bertsolari izateaz gainera bertso-eskolako irakasle ere aritu zen eta 1960an, 1962an, 1980an eta 1982an Txapelketa Nagusietan finalista izan zen. 1961ean Bizkaiko Bertsolari Txapelketaren txapeldun ere bai.