Bilboko Arte Ederren Museoaren handitze lanak amaitu bitartean, eta Eduardo Chillidaren jaiotzaren mendeurrenarekin bat eginez, Chillida Lekuk hartuko du ‘‘Topagunea IV’’ artelan monumentala.

Hamahiru tonako pisua duen obratzarra airean kokatu ahal izateko proiektua elkarlanean diseinatu dute Tecnaliak eta Loire Gestampek.

‘‘Topagunea IV’’ 1972an eraiki zuen Chillidak, eta leku publikoetan ezartzeko pentsatuak izan ziren zazpi obrako serie baten parte da. Eskultoreak 1982an obra dohaintzan eman zion Arte Ederren Museoari.