Aurten, lehen aldiz, Durango izango da «2025eko Sahararen aldeko Euskal Karabana» abiatzen ikusiko duen udalerria. Karabana horrek urtero laguntza humanitario tonak eramaten ditu Tindufeko (Aljeria) errefuxiatu sahararren kanpalekuetara.

Karabana solidarioaren beharra nabarmendu zuten, izan ere 2024ko irailean jasandako uholdeek egoera «larriagotu» dutela azaldu zuten, «duela ia 50 urtetik errefuxiatu horiei eragiten dieten gerraren, inflazioaren eta osasun krisiaren ondorioez gain».

Matxoaren hasieran Durangotik abiatuko da karabana, dena ondo bidean, eta oinarrizko elikagaien 100 tona eramatea izango du helburu. Hala nola arroza, pasta, lekaleak, oliba olioa, arrain latak eta funtsezko beste produktu batzuk; guztira, 4 edo 5 trailer handitan. Era berean, azaldu zuten anbulantzia bat eta lur orotako ibilgailu bat ere bidaliko dituztela. Alacanteko portuan ontziratuko dute, Tindufera joateko.

ELKARTASUNA

Mireia Elkoroiribe Durangoko alkateak herriak saharar herriarekin duen konpromisoa eta herritarren lankidetzaren garrantzia azpimarratu zituen: «Durangon harro gaude elkartasun karabana honen abiapuntua izateaz. Herritar guztiak gonbidatu nahi ditugu, urtarriletik otsailera bitartean egingo diren elikagaiak biltzeko kanpainekin bat egin dezaten, eta martxoaren hasieran karabanari agur esateko egingo den ekitaldian parte hartzera. Gure konpromisoa ez da soilik laguntza bidaltzea, baita kausa sahararraren bozgorailua izatea ere».

Bestalde, Mikel del Arcok eta Fatma Labiadek ekimen honen garrantziaz ohartarazi zuten, justizia humanitarioko eta nazioarteko elkartasun ekintza gisa: «Euskal Karabanak Saharari ematen dion laguntza itxaropenaren sinbolo bat da gure herriarentzat, baina baita nazioarteko komunitateak errefuxiatu sahararren sufrimenduari amaiera emateko jardun behar duela gogorarazteko ere».